Dilon ko ujaalo ! sehar ho gayi hai

Dilon ko ujaalo ! sehar ho gayi hai 

Nigahein mila lo ! sehar ho gayi hai 

Utho ! kashti-e-zeest ko zulmaton kay 

Bhanwar se nikalo ! sehar ho gayi hai 

Sanwaro ! yeh zulfein keh shab kat chuki hai 

Yeh aanchal sambhalo ! sehar ho gayi hai 

Shakista umeedon ki pur'waiyon ko 

Galay se laga lo ! sehar ho gayi hai 

Pighalnay laga hai zameer-e-mashee'at 

Utho sonay walo ! sehar ho gayi hai 

Baharon kay "Saghar" se ae meh'jamalo!

Zia'ein uchaalo ! sehar ho gayi hai  

Tafreeq ne jadu hi jagaya hai bala ka

Tafreeq ne jadu hi jagaya hai bala ka

Khatray main hai Ae yaar ! chaman mehar-o-wafa ka 

Toheen hai darwaish ka is shaher main jeena 

Ho faqa kashi naam jahan sabar-o-raza ka 

Ab tak ka tafakar gham-e-taqdeer ka chara 

Seenay main pata rakhtay hain jo arz-o-samaa ka 

Jee chahata hai Ae meray afkaar ki murat 

Malboos bana doon tujhay taron ki rida ka 

Mehfooz rahein meray gulistan ki fizaein 

Ho qatal-e-gul-o-lala taqaza hai saba ka 

Jaltay huye dekhay wohi masoom shagoofay 

Tha jin ko bharosa teray daman ki hawa ka 

Kuch sard si aahein hain to kuch doobtay aansoo 

"Saghar" yeh sila tujh ko mila soz-e-nawa ka

Hum be'khud-o-sar'shaar sada zinda rahein gay

Hum be'khud-o-sar'shaar sada zinda rahein gay 

Halaat kay may'khawar sada zinda rahein gay 

Kabhi waqif-e-aadaab-e-mohabbat nahin martay 

Kuch saahib-e-israar sada zinda rahein gay 

Ehsaas kay phoolon ko khizan chu nahin sakti 

Ulfat kay chaman zaar sada zinda rahein gay 

Hai anaa , junoon azmat-e-doran ki kahani 

Azmat kay talab gaar sada zinda rahein gay 

Nisbat hai jahan main gham-e-insaan se jin ko 

Woh deeda-e-baidaar sada zinda rahein gay 

Sholon main mehaktay huye ghunchay bhi hain "Saghar"

Zulmaat main anwaar sada zinda rahein gay 

Hai qasar-e-haqeeqat main teray dam se ujaala 

"Saghar" teray afkaar sada zinda rahein gay

Diyar-e-lala-o-saro-o-saman se guzray hain

Diyar-e-lala-o-saro-o-saman se guzray hain 

Qasam khuda ki teri anjuman se guzray hain 

Yeh rang-o-bu jo teray gaiso'on ka tal'chhat hain 

Talooh-e-subha ki pehli kiran se guzray hain 

Hazaar phool khilay apna qaafla na ruka !

Dilon pe daagh liye hum chaman se guzray hain 

Na ku-e-yaar ki chahat , na su-e-daar ki dhun 

Kisi kay aabru-e-doran-e-shikan se guzray hain 

Abhi na shamma jalao ! hamaray madfun par 

Keh zindagi kay andheray watan se guzray hain 

Hum hi se manzil-e-fikar-o-nazar jawan "Saghar" 

Hum hi jo wadi-e-shair-o-sukhan se guzray hain 

Aisi tajaliyan hain kahan aaftab main

Aisi tajaliyan hain kahan aaftab main 

Anwar-e-khas hain meray jaam-e-sharab main 

Yazdan ne muskura kay bari dair main likha 

Ik lafaz-e-aarzu meray dil ki kitab main 

Ab zoq-e-deed main hai shaoor-e-hayat-e-no 

Jalwon ki ehtiyat se rakho kitab main 

Mahjoob teray husan se ghunchon ki aabru 

Khushbu teray badan ki basi hai gulaab main 

Hai baagh'baan ki  tirchi nazar itni baat par 

Sholon ka zikar aa gaya shabnam kay baab main 

"Saghar" kisi yaad main jab ashk'baar thay 

Kitnay haseen din thay jahan-e-kharab main

Teri duniya main ya'rab zeest kay samaan jaltay hain

Teri duniya main ya'rab zeest kay samaan jaltay hain 

Faraib-e-zindagi ki aag main insaan jaltay hain 

Dilon main azmat-e-toheed kay deepak fasurda hain 

Jabeeno par riya-o-takabur kay farmaan jaltay hain 

Hawas ki baar'yaabi hai khird mandon ki mehfil main 

Ru pehli tikliyon ki oat main emaan jaltay hain 

Hawadas raqs farmaa hain , qayamat muskurati hai 

Suna hai na'khuda kay naam se toofan jaltay hain 

Shagoofay jhooltay hain , is chaman main bhook kay jhoolay 

Baharon main nash-e-man to behar-e-unwaan jaltay hain 

Kahin pazaib ki chhan chhan main majburi tarapti hai 

Riya dam tor deti hai , sunehray daan jaltay hain 

Manao ! jashan-e-may'noshi , bakhero ! zulf-e-may'khana 

Ibadat se to "Saghar" dehar kay shaitaan jaltay hain

Wusat-e-gaisoo-e-jaana se ulajh bathay hain

Wusat-e-gaisoo-e-jaana se ulajh bathay hain 

Surat-e-gardish-e-doran se ulajh bathay hain 

Midhat-e-bada-e-angoor ki khatar saqi !

Rind ik saahib-e-emaan se ulajh bathay hain 

Chand naghmay jo meray saaz-e-junoon ne chairay hain 

Masti-e-chasham-e-ghazalaan se ulajh bathay hain 

Aaj gum'nami-e-ehsaas ka parcham le kar 

Aadmi shehrat-e-yazdaan se ulajh baithay hain 

Aisay kuch log jinhein saahib-e-ikhlaas kahein

Phir meray haal-e-parishaan se ulajh bathay hain 

Nik'hatein sehan-e-gulistaan se khabar laai hain !

Phool Aadaab-e-gulistaan se ulajh bathay hain 

Kuch patangay ki ataa hai jinhein sholon ka mizaaj 

Ronaq-e-sham-e-ghareeban se ulajh bathay hain 

Mujh ko maloom nahin hijar kay qatal lamhay

" Mujh ko maloom nahin hijar kay qatal lamhay "

Mujh ko maloom nahin hijar kay qatal lamhay 

Tu ne kis aag main jal jal kay guzaray hon gay 

Kabhi lafzon main thakan tu ne sameiti ho gi 

Kabhi kaghaz pe faqat ashk utaaray hon gay 

Yeh bhi mumkin hai keh guzra hua lamha lamha 

Jis ko main aaj bhi seenay se laga rakhta hoon 

Teray nazdeek faqat yaad ki parchaai ho 

Door ki jaisay teri us se shanasaai ho 

Jis tarah dhoop december ki dareechay se lagi 

Be'irada kahin aangan main utar aayi ho 

Jaisay mehfil main kisi shakhs ki tanhai ho 

Kabhi qiyaas , kabhi woh gumaan badlay ga

Kabhi qiyaas , kabhi woh gumaan badlay ga 

Main jaanta tha woh apna biyaan badlay ga 

Meri aankhon main bhi rehna tujhay qabool nahin 

Bata keh aur tu kitnay makaan badlay ga 

Bas aik aas pe jeeta hoon aaj tak "Mola"

Kabhi to rang tera aasman badlay ga 

Yeh mum'tahin , yeh nateeja badal nahin sakta 

Ae dil faqat yeh tera imtihaan badlay ga 

Abhi to raah main kitany hi mor aanay hain 

Bata keh aur tu kitnay biyaan badlay ga 

Shikaar is liye mohtaat tha bhout "Atif"

Woh jaanta tha shikari machaan badlay ga  

Abhi to raat baqi hai

Abhi to raat baqi hai 

Abhi taray chamaktay hain 

Abhi suraj nikalnay main 

Zara ta'kheer baqi hai 

Abhi teri kahi baatein !

Meri palkon pe baithi hain 

Abhi manzir judaai ka 

Meri aankhon main thehra hai

Abhi ik aas ka deepak 

Meri aankhon main jalta hai 

Abhi jo khud se kehni hai 

Woh mushkil baat baqi hai 

Abhi kuch dair rona hai 

Abhi to raat baqi hai 

Kitna bojhal sa lehja tha

"Kitna bojhal sa lehja tha "

Kitna bojhal sa lehja tha 

Jab tu ne mujh se poocha tha 

Pyar kay baray main kuch bolo 

Ishq ki sari ramzein kholo 

Pyar ibadat kiyon hota hai ?

Dard ki koi had hoti hai ?

Hijar qayamat kiyon hota hai ?

Kitna bojhal sa lehja tha !

Jab tu ne yeh sab poocha tha 

Aur main us bojhal lehjay main 

Khud ko jalta dekh raha tha 

 

 

Teray meray beech zamana parta hai

Teray meray beech zamana parta hai 

Dil ko kitni baar bata'na parta hai 

Thehar gayi hai baat muqadar par aa kar 

Khud ko yeh aksar samjhana parta hai 

Sochon ko kab koi qaid kar paya hai 

Lakin khud ko to samjhana parta hai 

Rasta ho dushwaar ya raahi anjanay 

Is jeewan ka saath nibhana parta hai 

Khamoshi kay dasnay ka dar ho jis dam 

Aisay main khud shor machana parta hai 

Paas meray to sirf tumhari yaadein hain 

Yaadon se dil ko behlaana parta hai

Ajab si yeh mohabbat hai ajab sa rabt hai hum main

Ajab si yeh mohabbat hai 

Ajab sa rabt hai hum main 

Na ik doojay ko dekha hai 

Na ik doojay ki awazon main ik doojay ko dhoonda hai 

Tumhein jo kuch kaha main ne , ussay tum sach samajhti ho 

Mujhay jo kuch kaha tum ne , ussay main sach samajhta hoon 

Isi ik 

Chat window 

main 

Hum ik doojay kay jeewan kay her ik mousam main rehtay hain 

Ajab sa rabt hai hum main 

Ajab si yeh mohabbat hai 

Jissay tasveer aur awaz se kuch bhi nahin lena

Jissay khawaish nahin koi 

Kisi ko ru-ba-ru dekhein 

Kisi awaz ko poojein 

Mohabbat ki shabahat ko 

Kisi anmol saa'at ko  

Kisi kay aks main dhoondein 

Ajab si yeh mohabbat hai 

Keh jis main lafz kehtay hain aur aankhein kuch nahin kehtein 

Yeh lafzon se behalti hai , yeh un main saans leti hai 

Yeh un be'jaan tasveeron main kitnay rang bharti hai 

Ajab sa rabt hai hum main 

Ajab si yeh mohabbat hai 

Keh jaisay awaz aur tasveer se kuch bhi nahin lena 

Keh jo lafzon ki khushbu se dilon ko gun'gunati hai 

Keh jo palkon pe chahat kay hazaron khawab likhti hai 

Tumharay aur meray darmiyaan jo saans leti hai 

Ajab si woh mohabbat hai

Mujhay jo aankh se ojhal dikhaai deta hai

Mujhay jo aankh se ojhal dikhaai deta hai 

Woh chup rahay bhi to mujh ko sunaai deta hai 

Tumharay paaon main rakh di hai shairy apni 

Kisi ko kon youn apni kamaai deta hai 

Keh jaisay sab se gunnah'gaar hai woh duniya main 

Woh baat baat pe itni safaai deta hai

Jab khizaan ne sab darakhton ko akela kar diya

Jab khizaan ne sab darakhton ko akela kar diya 

Aik panchi dukh main dooba tehniyaan ginta raha 

Rait pe likhay huye woh naam kab kay mitt gaye 

Magar saahil pe baitha seepiyan ginta raha 

Jab talash-e-rizq ne chalnay ki taqat cheen li 

Baith kar foot'path par woh gariyan ginta raha

Abhi tak to hum khud'faraybi ki dhund main

Abhi tak to hum khud'faraybi ki dhund main 

Youn haathon ko thaamay 

Judai kay khadshon ko dil se nikalay 

Chalay jaa rahay hain 

Magar dhund chattay gi 

To maloom ho ga 

Keh hum is safar main akelay nahin hain 

Judai hamesha se thi saath apnay 

Zamanay se juda lagnay laga hai

Zamanay se juda lagnay laga hai 

Woh kitna ba'wafa lagnay laga hai 

Yeh kaisay dor main hum jee rahay hain 

Bashar bhi ab khuda lagnay laga hai 

Mujhay tareekiyon ne das liya hai 

Mujhay jugnoo diya lagnay laga hai 

Ajab si pyas thehri hai labon par 

Samandar bhi zara lagnay laga hai 

Dukhi logon kay aansoo ponjhta hai 

Woh kitna parsaa lagnay laga hai 

Youn apnay shaher main gum ho gaya hoon 

Keh her rasta naya lagnay laga hai 

Mohabbat ki tabiyat main agarcha gham nahin hota

Mohabbat ki tabiyat main agarcha gham nahin hota 

Magar khadsha judai ka ghamon se kam nahin hota 

Koi jugnoo, koi taara kahin se dhoond kar laao !

Gharon ko phoonk denay se andhera kam nahin hota 

Mohabbat karnay walay to hamesha saath rehtay hain 

Mohabbat main judai ka koi mousam nahin hota 

Mujhay tum chor kar khud bhi sari umar tarpay ho 

Koi aisi saza detay tumhein to gham nahin hota

Zameen walon se yeh keh kar falak se dhal gaya suraj 

Ujaala baant denay se ujaala kam nahin hota

Tum se milnay ka wada tha

Jeet 

Tum se milnay ka wada tha 

Jee karta tha 

Jaisay mujh ko tarpati ho 

Waisay hi tum ko tarpa'on 

Tum se aaj na milnay jaaon 

Lakin aaj bhi dekho jana !

Meri mohabbat , meri zid se 

Jeet gayi hai