Imran's Poetry: 04/09/15

Apr 9, 2015

Aaj us kay rukhsaar pe wohi muskurahat

Phir se kisi ghreeb kay dil ki khair nahin

Aur kuch nahin hota to bhari baarishon main

Tujh se bichray huye raston pe safar karta hoon

Kabhi sajjna kabhi kangna kabhi gulzaar lagti ho

Jo hansti tum ho bhoolay se koi gulnaar lagti ho

Tumhari lambi palkein , tumhari dil'ruba aankhein

Soti ho jo raaton main koi funkaar lagti ho

Tumharay surkh yeh aariz, tumhari reshmi baanhein

Meray khawabon ki jannat ka koi kirdaar lagti ho

Tumharay phool se gaisoo jab urrtay hain fizaon main

Sunehri shaam suraj ki koi takraar lagti ho

Tumhara gandami chehra meri yaadon ki doulat hai

Barasti ho jab aankhon se koi phu'haar lagti ho

December main meri jana kabhi jo rooth jaati ho

Hijar ki aag main jalti koi talwaar lagti ho

Tumharay husn ka sadqa ghazlon main adaa kar kay

Jo likhta hoon main kaaghaz par koi shah'kaar lagti ho

Rang-e-mousam hai aur baad-e-saba

Shehr koochon main khaak uraati hai

Farsh par kaaghaz urrtay phirtay hain

Maiz pe gard jamti jaati hai

So gaye phir jaag uthi khushboo

Zindagi khawaab kiyon dikhaati hai

Kya sitam hai keh ab teri surat

Ghour karnay pe yaad aati hai

Kon is ghar ki dekh baal karay

Roz ik cheez toot jaati hai

Rutt jab maazi ki suhaani yaad aati hai

Hamein do premiyon ki kahani yaad aati hai

Majnoo sa ik larka pagal yaad aata hai

Laila si ik pagli dewani yaad aati hai

Shab bhar tehalta woh raja yaad aata hai

Lihaaf orrh kay roti woh rani yaad aati hai

Farhaad sa woh pathar sa jazba yaad aata hai

Sheereen si woh mom si jawani yaad aati hai

Sunati thi jo shab ko sulanay ki khatir

Mujhay woh us burhiya ki kahani yaad aati hai

Woh dard mousam woh canteen woh iqraar-e-wafa

Mujhay woh shaam december ki suhaani yaad aati hai

Samjh main nahin aata hanson ya roun

Mujhay jab meray maazi ki na'daani yaad aati hai

Phir se her boond main us lams ki lazzat le kar

Baarishein aah laganay ka hunar layi hain

Teri aankhon pe ek likhi ghazal

Kuch adhoori si kuch mukamal

Likhta hoon teri aankhon ko kanwal

Reshmi reshmi narm makhmal

Behta hai in main pyaar ka sagar

Lehron ki hai in main halchal

Hansti muskurati hain teri aankhein

Jab jhapkein to lagein lehraya kisi ne aanchal

Shokhi teri aankhon ki dekh kay jeeta hoon

Youn hi karay yeh shararat rahein chan'chal

Aayi ho jaisay khizan pe bahaar sajni

Khili ho phir palkon ki kaali kaali kompal

Kashaf hai teri aankhon se maqtool

Ab youn zulm na dhaa tu her pal

Kaha tum ne mujhay dil se bhula do tum

Mita do tum

Chalo main maan leti hoon

Tumhein main apnay dil se

Bhula doon gi mita doon gi

Magar ik kaam to kar do

Keh dariya kay kinaron ko kisi surat se mila do tum

Sitaray tor kar laa doon

Ya phir is phool se khushboo juda kar kay dikha do tum !

Sunno tum kar bhi lo aisa

Kinaray jor bhi laayo

Sitaray tor bhi laao

Chaman kay saaray phoolon se

Juda khushboo ko kar bhi do

Magar main tum ko is dil se mitta phir bhi nahin sakta

Suno main mar to sakti hoon

Bhula phir bhi nahin sakti

Ae dil meri shakist-e-wafa par na muskura

Tu bhi shareek hai , meray haal-e-tabahi main

Bhout raat ho gayi ab loatna hai mujhay

Meray bister pe muntazir hai tanhai meri

Yeh andheray to simat jayein gay ik din Ae dost

Yaad aaye ga tujhay mujh se guraizan hona

Ujaala ban kar aa jaao meray tareek lamhon main

Keh teray bin sabhi khushiyan mujhay ghamgeen lagti hain

Hasrat se dekhtay rahay maazi ko is tarah

Jaisay keh loat aayein gay jo din guzar gaye

Tehreer main aa jaye agar lafz-e-hudai

Mehsoos yeh hota hai qalam toot raha hai

Kisi ko kya jo qadmon pe jabeen-e-bandagi rakh di

Hamari cheez thi hum ne jahan chahi wahin rakh di

Chaman kay rang-o-boo ne is qadar dhokay diye hum ko

Keh hum ne shouq-e-gul'bosi main kaanton par zubaan rakh di

Jab wapis dil maanga to woh bolay keh tehro yaad karnay do

Zara si cheez thi hum ne khuda janay kahan rakh di