Laakh kaata hai teri yaad ko jarr se main ne

Laakh kaata hai teri yaad ko jarr se main ne 

Kya karon , phir yeh shajar mujh main nikal aata hai ?

Jab bhi socha hai mohabbat nahin karni , ab kay 

Phir mohabbat ka asar mujh main nikal aata hai 

Chaltay chaltay jo thakawat se main sastanay lagon 

Apni janib ka safar mujh main nikal aata hai

Shaam partay hi udasi ka yeh mousam Yawar 

Laakh rokon main magar mujh main nikal aata hai 

 

Tera sheerein lab-o-lehja , main kaisay bhool sakta hoon

Tera sheerein lab-o-lehja , main kaisay bhool sakta hoon 

Aur us pe chand sa chehra , main kaisay bhool sakta hoon 

Woh jis dam kho gaya tha main teri chahat kay melay main 

Bata mujh ko keh woh lamha , main kaisay bhool sakta hoon 

Woh jis main ki biyaan tum ne haqeeqat , zindgani ki 

Tera sada sa woh jumla , main kaisay bhool sakta hoon 

Kisi kay hijar main barson jahan ki khaak chaani hai 

Bhala us dasht ka rasta , main kaisay bhool sakta hoon 

Kisi talwar ki tarah woh jis ne dil ko cheera tha 

Woh teri aankh ka kajla  , main kaisay bhool sakta hoon 

Woh jo sairaab karta tha meray ehsaas ko Yawar 

Mohabbat ka woh sar'chashma , main kaisay bhool sakta hoon

Teri chahat ne mujhay aisa hunar baandha hai

Teri chahat ne mujhay aisa hunar baandha hai

Main ne suraj ko bhi andaaz-e-qamar baandha hai 

Aik pal chain se tiknay nahin deta hai kahin 

Tum ne kaisa meray paaon main bhanwar baandha hai 

Mujh ko be'noor usi noor-e-nazar ne hai kiya 

Main ne aankhon pe jissay misl-e-qamar baandha hai 

Koi jadoo hai na manzil ki talab hai dil main 

Jaane kiya soch kay phir rikhat-e-safar baandha hai 

Aur kuch bhi nahin baandha hai mohabbat ki qasam 

Main ne ghazlon main faqat dard-e-jiger baandha hai 

Poet : Imran Rasheed Yawar