Tum na maano magar haqeeqat hai
Ishq insaan ki zaroorat hai
Us ki mehfil main baith kar dekho
Zindagi kitni khoobsurat hai
Sep 12, 2014
Jab tum apnay ho
Phir dukh kaisa
Jab tum apnay ho
Aur hum apnay hain
Phir dukh kaisa
JAb zameen se uggay fasanay
Aur dil main chuppay khazanay
Sab aik hain
Phir dukh kaisa
Jo us ne lagay tan par
Aur hum ne sajaye dil main
Sab zakham hain
phir dukh kaisa
Jab phoolon kay chehray par
Aur dil se behtay lahoo main
Sab rang hain
Phir dukh kaisa
Jab jheel se behta paani
Aur aankh se tapka aansoo
Sab aik hain
Phir dukh kaisa
Saamnay baitha tha meray aur woh mera na tha
Faaslay aisay bhi hon gay yeh kabhi socha na tha
Saamnay baitha tha meray aur woh mera na tha
Woh keh khushboo ki tarah phaila hua tha chaar su
Main ussay mehsoos kar sakta tha choo sakta na tha
Raat phir pichli si aahat kaan main aati rahi
Jhaank kar dekha gali main koi bhi aya na tha
Aaj us ne dard bhi apnay alhe'da kar diye
Aaj main roya to meray saath woh roya na tha
Yeh sabhi veeraniyan us kay juda honay se thein
Aankh dhundlai si thi sar dhundlaya na tha
Yaad kar kay takleef aur bhi hoti thi adeem
Bhool janay kay siwa ab koi bhi chara na tha
Jo guzra sehan-e-gulshan main zamana bhool ja
Leh'lahaati shaakh par apna thikaana bhool ja
Jo guzra sehan-e-gulshan main zamana bhool ja
Jung ka ilaan kar day baagh'baano kay khilaaf
Nazar-e-aatish jo hua woh ashiyaana bhool ja
Sab ana'dil gungunaatay hain bahaaron main jaisay
Yeh zamana kehta hai to woh traana bhool ja
Her sana gar ki baghal main hai churri ae hum'nawaaz
Dosti to ehal-e-gulshan se nibahana bhool ja
HAq praston kay huye hain sar qalam jis dour main
Her koi kehta hai "Raahi" woh zamana bhool ja
Apni chahaton ka ik hisaab rakhna
Tum se arz faqat itni si hai
Tum se arz faqat itni si hai
Meri hansti khailti zindagi ko
Taza gulaabon ka baab likhna
Jo chalon main to meray sang chalna
Jo giron to thaam lena
Kabhi jo main rooth jaaon to
Meri simat tum chalay aan a
Barhaa kar haath apna man'na lena
Magar suno
Hum qna'at pasand log hain
Apni chahaton ka ik hisaab rakhna
Tum se arz faqat itni si hai
Kiya mila teri justagoo kar kay
Apni aankhain lahu lahu kar kay
Kiya mila teri justagoo kar kay
Ik tamana hai bas yahi dil main
Dekhon tujh ko main ru-ba-ru kar kay
Ab woh shayed kabhi na meray hon
Un se dekha hai guftagoo kar kay
Teri qurbat ko paalnay kay liye
Baith jatay hain hum wuzu kar kay
Hum se "Rana" khafa khafa hain woh
Kaam aisay gaye adu kar kay
Subha jis dam main jaaga hoon
Khushi ka din mubaarak ho
Subha jis dam main jaaga hoon
Ajeeb manzar yeh dekha
Khushi ka raqas hai her su
Hawaon main bhi hai khushboo
Darakhton kay haray pattay
Khushi se lehlahatay hain
To yuon mehsoos hota hai
Yeh sab taali bajaatay hain
Prinday cheh'chatay hain
Ya shayed gun'gunaatay hain
Koi to baat hai aisi
Ho her shay par hai youn masti
Meray dil main hui hal'chal
Mujhay kuch yaad aya hai
KEh din hai yeh wohi shayed
Kai baras pehlay jab
Usi din kay kisi lamhay
Jo tum duniya main aye thay
YEh mousam aur sab hawaein
Darakhton kay haray pattay
Prinday aur fizaein sab
Khushi se keh rahay hain yeh
Tumhain yeh din mubarak ho
Khushi ka din mubarak ho
Rat'jagon ka azaab rehnay do
Zindagi par ataab rehnay do
Rat'jagon ka azaab rehnay do
Zikar chairo wisaal ka ab to
Hijar ka aztraab rehnay do
Itna kaafi hai tum hamaray ho
Dosron ko janaab rehnay do
Koi tabeer ho na ho in ki
Meri aankhon main khwaab rehnay do
Tum se silaab ruk nahin saktay
Bastiyaan zer-e-aab rehnay do
Tum kizaan ka paiaam laye ho
Phir bhi ik do gulaab rehnay do
Ab na ulto naya warq koi
Band gham ki kitaab rehnay do
Shehzaday tum phool nagar kay baasi ho
Shehzady
Shehzady
Tum phool nagar kay baasi ho
Nazuk se phoolon main rang sajatay ho
Sapno ki komal duniya ko chahat se mehkaatay ho
Champa, chambaili, gulaab aur bela
Saray teray saathi hain
Shokh se khushboo buntay ho
Aur rangon main dhal jaatay ho
Shehzady tum mera aanchal dekh rahay ho
Kitna maila , kitna khaali
Zard sa odha rang hai is ka
Khaali is kay haath
Jaga jaga se dast bareeda , jaga jaga se zakhmi hai
Sehzady mera yeh aanchal tum phoolon se bhar do na
Sehzaday kuch phool nagar kay phool mujhay bhi dy do na
Shokh se gehray rangon se meray aanchal ko rang do na
Khushboo se mehkaao aur rangon se bojhal kar do na
Apnay pyaar ki baarish se meray mann ko jal thal kar do na
Itna mujh ko chaho keh tum
Mujh ko pagal kar do na
Shehzaday tum phool nagar kay baasi ho
Mujh ko phool ka tohfa de do na
Kaho jana tumhain kis baat ka dar hai
Woh mujh se poochta tha
Kaho jana
Tumhain kis baat ka dar hai
Main tum ko chor jaaon ga , kabhi wapis nahin aaon ga
Tumhain dil se bhula doon ga , kabhi wapis na aaon ga
Tumhain dil se bhula doon ga, yeh taaluq rakh na paaon ga
Kaho jana tumhain kis baat ka dar hai
Tumharay hotay koi doosri larki
Meray dil-o-nigah main , qasam lay lo bas nahin sakti
Keh jab tak saans chalti hai
Tumhain main kho nahin sakta , kisi ka ho nahin sakta
Kaho jana , tumhain kis baat ka dar hai
Kiyon mujh se bad'gumaan ho tum
Qasam lay lo tumhain kho kar main hargiz jee nahin sakta
Keh yeh "Zehar-e-judai" jo hai is ko pee nahin sakta
Suno , jana
Meri be'loas chahat par
Kabhi apnay yaqeen kay hont rakho
Main kitna pyaar karta hoon , Kabhi azmaa kay dekho
Baray dawaye woh karta tha , Woh janay kiya kiya kehta tha
Main is kay talismi daawon ki dori main uljh kar
Khud hi apnay aap ko framosh kar baithi
MAgar aik dam jo rutt badli
To mujh se kho gaya sang'dil ,kisi ka ho gaya sang'dil
Woh jsi ka dil meray dil main dharakta tha
Jo meri rooh main hi saans leta tha
Badalti rut main youn badla keh phir
Koi bhi daawa yaad us ko reh na paya
Mohabbat kay safar main aik dam se raah badalnay ki wajahwoh keh nahin paya
Woh jis ko aik pal meray bina jeena bhout dushwaar lagta tha
Jo meri ik pal ki khamoshi pe tarap uth'ta tha
Usi sandil ne meri rooh main veeraaniyan bhar dein
Meri roshan nigahon main ajab hairaaniyan bhar dein
So ab hum hain , hamara dard hai , aur be'zubaani hai , yahi apni kahaani hai
Subscribe to:
Posts (Atom)
