Akelay lawn kay goonjtay sanatay main

Akelay lawn kay goonjtay sanatay main 

Chandani ki mar mar'ein baarish main bheegti hui 

Ik tanha afsurda larki 

Apnay phailay huye haath ko takti hai 

Takti hai aur sochti hai 

Woh naam , , ,

Jo us kay liye raha zeest ka unwaan hai 

Shariyano main jo lahu ki jaga rawan hai 

Woh naam , , ,  ,

Jis ki chandani dasht-e-zaat pe ehsaan hai 

Jis ki asaaib ab bhi wehshaton ka samaan hai 

Woh naam , , , ,

In lakeeron main kahan hai ? !!

Aaj malboos main hai kaisi thakan ki khushboo

Aaj malboos main hai kaisi thakan ki khushboo

Raat bhar jaagi hui jaisay dulhan ki khushboo

Peh'rahan mera magar us kay badan ki khushboo

US ki tarteeb hai ik ik shikan ki khushboo

Qamat shair ki zaibaai ka aalam mat pooch 

Mehar'baan jab se hai us sard badan ki khushboo

Zikar shayed kisi khurasheed badan ka bhi karay 

Ku-ba-ku phaili hui meray gehan ki khushboo

Aariz-e-gul ko chua tha keh dhanak si bikhri 

Kis qadar shokh hai nanhi si kiran ki khushboo

Aik raat ujaalo meray liye

Aik raat ujaalo meray liye

Aik raat ujaalo meray liye

Main so jaaon , , , tum jaago

Ik shabnam haath rakho seenay par 

Lams jagay to lab mehkaao 

Saans main phool khilaao 

Hawa chalay to 

Palkon pe taaray barsaao 

Neend kay par phailay jayein 

Phir khawab samandar jaago

Aik raat ujaalo meray liye

Main so jaaon tum jaago 

Us ne mujhay chor diya

Us ne mujhay chor diya 

Pehlay dil ki ujrri zameen par 

Khawaab mohabbat kay sajaye

Phir , ,  , ,  ,!

Meri aankhon main kuch deep jalaye

Kabhi cyhaand , kabhi gulaab kaha 

To , ,  , , ,!

KAbhi sapno ki raani kaha 

Phir , , , ,  ,!

Woh meri zindagi ban gaya 

Aur , ,  , ,!

Jab us ki mohabbat meri rooh ko deemak ki tarah lag gayi

To , , , , , ,  , ,!

Us ne mujhay chor diya

Mujhay tum se yeh kehna hai

Mujhay tum se yeh kehna hai 

Mujhay tum se mohabbat thi 

Mujhay tum se mohabbat hai 

Meray din raat main tum ho

Meri her baat main tum ho

Khushi kay jitnay mousam bhi

Tumharay saath dekhye hain 

Meray jeevan ka haasil hain 

Tumharay naam kay jugnoo

Tumharay lams ki khushboo

Tumharay pyaar ka jaadu

Meri rag rag main shamil hain 

Main apni zaat kay chahye kisi mousam main rehta hoon 

Her aik mousam tumhara hai 

Tumhara saath pyaara hai 

Meray her pal main rehti ho 

Mera dil hai pagal sa

Isi pagal main rehti ho

Suno ! tum se yeh kehna hia 

Keh tum meri mohabbat se kabhi mat bad'gumaan hona 

Keh meri zindgaani kay sabhi rastay jo sach poocho

Tumhari simat aatay hain 

Main tum se door reh paaon ab yeh mumkin nahin jaana

Suno ! ehad-e-mohabbat ki mujhay tajdeed karni hai 

Purani baat hai lakin mujhay phir bhi yeh kehni hai 

Mujhay tum se mohabbat thi , mujhay tum se mohabbat hai 

Her ik mousam tumhara hai 

Tumhara saath pyaara hai 

Suno ae hamsafar meri 

Poet :~ Atif saeed

Tum hotay ho meray kon

Tum hotay ho meray kon 

Sapnay kaisay baatein karein 

Khadshon ki zanjeer pari hai 

Neend bhari sab aankhon main 

Sapnay kaisay baat karein 

Jin logon ka rasta taktay 

Umrain rizq khaak huwein 

Ab woh log aur un kay sapnay dekhnay wali 

Aankhein bujh kar raakh huwein 

Raakh kay is ambaar main hoon 

Kaisay kaisay zinda khawab 

Kahwabon ki is raakh ko lakin 

Chairay kon ?

Jis matti main rait mili ho

Us main kaisay baagh lagaein 

Dariya hi pa'yaab hon ! jab to

Is main kashti kya lay jayein 

Khushboo ik awara jhonka 

Is jhonkay ko ghairay kon 

Kaisay duniya ko batlaaon 

Tum hotay ho meray kon !!!

Meri ghazal ka taaluq teray khayal se hai

Her ik pal ka taaluq teray khayal se hai 

Meri ghazal ka taaluq teray khayal se hai 

Bandha hua hai teri aarzoo se sara badan

Her ik amal ka taaluq teray khayal se hai 

Yeh tishnagi to mujhay jaan se bhi pyaari hai 

Keh meray thal ka taaluq teray khayal se hai

Keh meri rooh ki saari bahaar tujh se hai 

Kanwal kanwal ka taaluq teray khayal se hai 

Yeh zindagi bhi hai teri ataa ae jaan-e-jaan 

Agar ajal ka taaluq teray khayal se hai 

Yeh meri rooh munaqish hai teri yaadon se

Keh is mehal ka taaluq teray khayal se hai 

Firaaq-o-hijar kay yeh jis qadar masaa'il hain

Sabhi kay hal ka taaluq teray khayal se hai 

Ajnabi shaam

Ajnabi shaam 

Dhund chaai hui hai jheelon par 

Urr rahay hain parinday teelon par

Sab ka rukh hai nashemano ki taraf

Bastiyon ki taraf , bano ki taraf

Apnay gal'lon ko le kar charwahay

Sarhadi bastiyon main ja ponchay

Dil-e-na'kaam ! main kahan jaaon ?

Ajnabi shaam ! main kahan jaaon 

Zabt ki intiha

Zabt ki intiha

Woh aksar kaha karta tha 

MAin tumharay her dukh se ba'khabar hoon

Magar tumharay zakhmon pe marham nahin rakh sakta 

JAb tak main tumharay zabt ki intiha na dekho loon 

Lo phir aaj meray zabt ki intiha dekh lo 

Is aakhri waqat main hosla dekh lo 

Ab na rona mujhay meray janay kay baad 

Mar na jana mujhay azmanay kay baad

Tamam umar rahay yehi tamana kartay

Meri aankhon kay samandar main utar'ta koi 

Tamam umar rahay yehi tamana kartay 

Her ik ko sunaya haal-e-dil khul kar 

Keh shayed meri dewangi ki dawa kar de 

Jo bhi aata hai meray dil main , chala jata hai 

Jaisay Asaib hain meray dil main raha kartay 

Acha hi hua keh bach gaye barq-e-mohabbat se

Dil toot jata to bhala kya kartay ?

Ab to aik hi iltijaa kartay hain Rab-e-kareem se

Meri rooh ko ab jism se rihaa kar de 

Teri aarzoo hi , teri raqeeb nikli Zohaib 

Kuch khawab kabhi pooray nahin hua kartay