Aainda kabhi uss se mohabbat nahin ki jaye

Aainda kabhi uss se mohabbat nahin ki jaye 

Ki jaye to phir uss ki shikayat nahin ki jaye 

Iss ma'raka-e-ishq main Ae ehal-e-mohabbat 

Aasaan hai adawat pe adawat nahin ki jaye 

Yeh dil keh ussi zood faramosh pe mayel 

Aur zehan ba'zad uss se mohabbat nahin ki jaye 

Hum ehal-e-sukhan hain to riwayat kay mutabaq 

Masloob kiya jaye riya'at nahin ki jaye 

Yeh log tamasha hain to phir in se junoon main 

Koi bhi biyaan dil ki hikayat nahin ki jaye 

Mujhay mout de keh hayat de

Mujhay mout de keh hayat de 

Meray be'hunar mera saath de 

Meri piyaas sadiyon ki piyaas hai 

Meray kar'bala ko faraat de 

Meray rat'jagon kay hisaab main 

Koi aik  neend ki raat de 

Koi aisa ism-e-azeem ho 

Mujhay teray dukh se nijaat de 

Yeh jo tai'ragi hai gharoor main 

Koi roshni issay maat de 

Meri shairy kay naseeb main 

Koi aik harf-e-sabaat de 

Jis tarah maan ki dua hoti hai

Jis tarah maan ki dua hoti hai 

Shairy rad-e-bala hoti hai 

Shaam-e-tanhai main

Shaam-e-tanhai main 

Ab bhi shaair rahoon 

Kis ki khatar rahoon 

Kon hai jo meray lafz-o-mahni ki aankhon se behtay huye 

Aansu'on main chuppay dard chunta phirray 

Khawaab bunta phirray 

Kon hai jo meray khoon hotay huye dil ki awaaz par 

Apni awaz kay hont rakhta phirray 

Kon aankhein meri daikh kar yeh kahay 

"Kya hua jaan-e-jaan "

Kab se soyi nahin 

Iss se pehlay to tum itna royi nahin 

Ab bhala kis liye Khoobsurat si aankhein parishaan hain 

Apni halat pe khud itni hairaan hain 

Kon be'chain ho 

Kon be'taab ho 

Mousam-e-hijar ki shaam-e-tanhai main 

Aablaa paai main 

Kon ho hum'safar , gard hai rah'guzar 

Koi rasta nahin , koi raahi nahin 

Dar pe dastak ki koi gawahi nahin 

Dil kay veeran-o-bar'baad safhaat par 

Jis qadar lafz likhay thay be'kaar hain 

Aik lambi judai kay Aasaar hain

Sochti hoon keh ab 

In khayalon se , khawabon se baahir rahoon 

Kiyon main shaair rahoon 

Kis ki khatar rahoon 

Bhout ta'kheer se lakin khulla yeh bhaid khud par bhi

Bhout ta'kheer se lakin 

Khulla yeh bhaid khud par bhi 

Keh main ab tak 

Mohabbat jaan kar jis 

Jazba-e-da'reena ko apnay lahu se seenchti aayi 

Woh jis ki sa'at-e-sad meharban hi zindagi ki shart thehri thi 

Faqat ik sha'iba hi tha mohabbat ka 

Youn hi aadat thi her rastay pe uss kay saath chalnay ki 

Wagarna tark-e-khawaish par 

Yeh dil thora sa to dukhta 

Zara si aankh num hoti 

Chup na rehtay biyaan ho jatay

Chup na rehtay biyaan ho jatay 

Tujh se gar bad'gumaan ho jatay 

Zabat-e-gham ne bacha liya warna 

Hum koi daastaan ho jatay 

Tu ne daikha nahin palat kay hamein 

Warna hum meharbaan ho jatay 

Teray qissay main hum bhala khud se 

Kis liye bad'gumaan ho jatay 

Teray dil ki zameen hi na mili 

Warna hum aasmaan ho jatay 

Her jaanib veerani bhi ho sakti hai

Her jaanib veerani bhi ho sakti hai 

Subha ki rangat dhaani bhi ho sakti hai 

Jab kashti daali thi kis ne socha tha 

Dariya main tughiyaani bhi ho sakti hai 

Naye safar kay naye azaab aur naye gulaab 

Surat-e-haal purani bhi ho sakti hai 

Her pal jo dil ko deh'laye rakhti hai 

Kuch bhi nahin hairaani bhi ho sakti hai 

Safar-e-iraada kar to liya par raston main 

Raat koi toofani bhi ho sakti hai 

Uss ko meray naam se nisbat hai lakin 

Baat yeh aani jaani bhi ho sakti hai 

Dil tha keh khush khayal tujhay daikh kar hua

Dil tha keh khush khayal tujhay daikh kar hua 

Yeh shaher be'misaal tujhay daikh kar hua 

Apnay khilaag shaher kay andhay hajoom main 

Dil ko bhout malaal tujhay daikh kar hua 

Tool-e-shab-e-firaaq teri khair ho keh dil 

Aamaada-e-wisaal tujhay daikh kar hua 

Yeh hum hi jaantay hain judai kay morr par 

Is dil ka jo bhi haal tujhay daikh kar hua 

Aayi na thi kabhi meray lafzon main roshni 

Aur mujh se yeh kamaal tujhay daikh kar hua 

Bichray to jaisay zehan mo'atal sa ho gaya 

Shaher-e-sukhan ba'haal tujhay daikh kar hua 

Phir log aa gaye mera maazi kuraid'nay

Phir mujh se ik sawal tujhay daikh kar hua  

Suno larki ! Kisi ko tum ne chaha tha

Suno larki !

Kisi ko tum ne chaha tha 

Tumhein woh mil nahin paya 

Kisi ko main ne chaha tha 

Mujhay woh mil nahin paai 

Adhoori tum bhi ho ab tak 

Adhoora main bhi hoon ab tak 

Adhooray pan ki tanhai 

Tujhein bhi dasti rehti hai 

Adhooray pan ki tanhai 

Mujhay bhi dasti rehti hai 

Adhooray pan se tum bhi ab 

Nikalna chahati ho na 

Adhooray pan se main bhi ab 

Nikalna chahata hoon bas 

Tumharay aur meray sab 

Masa'il aik jaisay hain 

Sabhi gham aik jaisay hain 

Sabhi dukh aik jaisay hain 

Suno Larki !

Chalo aik kaam kartay hain 

Mujhay tum waisa hi chaho 

Keh jaisa uss ko chaha tha 

Tumhein main waisa hi chahon 

Keh jaisa uss ko chaha tha 

Chalo aayo keh mil jul kar 

Naya ik ghar basatay hain 

Mohabbat kay diye ko phir 

Mohabbat se jalatay hain 

Alfaaz kay jhootay bandhan main

Yeh ishq mohabbat mehar-o-wafa 

Alfaaz kay jhootay bandhan main 

Aaghaz kay gehray pardon main 

Her shakhs mohabbat karta hai 

Halan'keh mohabbat kuch bhi nahin 

Sab jhootay rishtay naatay hain 

Sab dil rakhnay ki baatein hain 

Kab kon kisi ka hota hai 

Sab asli roop chupatay hain 

Ehsaas se khaali log yahan 

Lafzon kay teer chalatay hain 

Ik baar nazar main aa kay woh 

Phir saari umar rulatay hain 

Yeh ishq mohabbat mehar-o-wafa 

Yeh sab kehnay ki baatein hain 

Her shakhs khudi ki masti main 

Bas apni khatir jeeta hai