Suno larki ! Kisi ko tum ne chaha tha

Suno larki !

Kisi ko tum ne chaha tha 

Tumhein woh mil nahin paya 

Kisi ko main ne chaha tha 

Mujhay woh mil nahin paai 

Adhoori tum bhi ho ab tak 

Adhoora main bhi hoon ab tak 

Adhooray pan ki tanhai 

Tujhein bhi dasti rehti hai 

Adhooray pan ki tanhai 

Mujhay bhi dasti rehti hai 

Adhooray pan se tum bhi ab 

Nikalna chahati ho na 

Adhooray pan se main bhi ab 

Nikalna chahata hoon bas 

Tumharay aur meray sab 

Masa'il aik jaisay hain 

Sabhi gham aik jaisay hain 

Sabhi dukh aik jaisay hain 

Suno Larki !

Chalo aik kaam kartay hain 

Mujhay tum waisa hi chaho 

Keh jaisa uss ko chaha tha 

Tumhein main waisa hi chahon 

Keh jaisa uss ko chaha tha 

Chalo aayo keh mil jul kar 

Naya ik ghar basatay hain 

Mohabbat kay diye ko phir 

Mohabbat se jalatay hain 

Alfaaz kay jhootay bandhan main

Yeh ishq mohabbat mehar-o-wafa 

Alfaaz kay jhootay bandhan main 

Aaghaz kay gehray pardon main 

Her shakhs mohabbat karta hai 

Halan'keh mohabbat kuch bhi nahin 

Sab jhootay rishtay naatay hain 

Sab dil rakhnay ki baatein hain 

Kab kon kisi ka hota hai 

Sab asli roop chupatay hain 

Ehsaas se khaali log yahan 

Lafzon kay teer chalatay hain 

Ik baar nazar main aa kay woh 

Phir saari umar rulatay hain 

Yeh ishq mohabbat mehar-o-wafa 

Yeh sab kehnay ki baatein hain 

Her shakhs khudi ki masti main 

Bas apni khatir jeeta hai 

Rishta torr kay janay walay

Rishta torr kay janay walay 

Mujh ko chor kay janay walay 

Ab ki eid par 

Mujh ko jitnay card milay 

Un cardon main 

Sab se payara 

Sab se acha 

Pehla card tumhara hai 

Mujh ko chor kay janay walay 

Zara kaho tum 

Yeh kis taraf ishara hai ....?

Agar mohabbat ki hadd nahin koi

Agar mohabbat ki hadd nahin koi 

Dard ka bhi hisaab kiyon rakhon  

Yeh haseen shaam apni

Yeh haseen shaam apni

Abhi jis main ghull rahi hai

Teray peh'rahan ki khushbu

Abhi jis main ghull rahay hain

Meray khawab kay shagoofay

Zara dair ka hai manzir

Zara dair main ufaq pe

Khillay ga koi sitara

Teri simat daikh kar woh

Karay ga koi ishara

Teray dil ko aaye ga phir

Kisi yaad ka bulawa

Koi qissa-e-judai

Koi kaar-e-na'mukamal

Koi khawab-e-na'shagufta

Koi baat kehnay wali

Kisi aur aadmi se

Hamein chahiye tha milna

Kisi ehad-e-meharban main

Kisi khawab kay yaqeen main

Kisi aur aasman main

Kisi aur sar'zameen main

Bujha diye hain khud apnay haathon

Bujha diye hain khud apnay haathon 

Mohabbaton kay diye jala kay 

Meri wafa ne ujaar di hain 

Umeed ki bastiyan basa kay 

Tujhay bhulaa dain gay apnay dil se

Yeh faisala to kiya hai lakin 

Na dil ko maloom hai na hum ko 

Jeeyein gay kaisay tujhay bhulaa kay 

Kabhi milein gay jo raastay main 

To munh phair kar palat parein gay 

Kahin sunein gay jo naam tera to 

Chup rahein gay nazar jhukaa kay 

Na sochnay par bhi sochta hoon 

Keh zindgani main kya rahay ga ?

Teri tamana ko dafan kar kay 

Teray khayalon se door jaa kay 

Neend bharri aankhon se ik sapna daikha

Neend bharri aankhon se ik sapna daikha 

Door , bhout door main ne koi apna daikha 

Ussay qadmon ki chaap sunaai deti hai 

Jissay kabhi ik zamanay se nahin daikha 

Woh loat aaye ga iss baat ka yaqeen to tha 

Par kabhi kisi ko itni dair kartay nahin daikha 

Aaj kiyon uss ki aankhein num lagti hain 

Jissay youn kabhi na main ne ashk'baar daikha 

Nahin hai yeh rutt milnay ki woh mousam aur hi ho ga

Nahin hai yeh rutt milnay ki woh mousam aur hi ho ga 

Teray aanay ki gharriyon ka woh aalam aur hi ho ga 

Koi madham mehak aa kar galay ka haar banti hai 

Udasi hijar ki jaisay wisaal-e-yaar banti hai 

Teray phoolon se honton par tabasum aur hi ho ga 

Jahan jis main rafaqat ki khushi mehsoos hoti hai 

Mohabbat jis main her shay da'imi mehsoos hoti hai 

Hamaray haal kay raazon ka mehram aur hi ho ga 

Din guzar jaata hai , raat guzar jaati hai

Din guzar jaata hai , raat guzar jaati hai 

Par teri yaadein aankhon ki nami ban kar 

Meray dil ki gehraai main kahin 

doob jaati hain 

Kabhi beh jaati hain palkon talay se

Kabhi dil hi main atak jaati hain 

Unn yaadon se daman churaana 

Un yaadon se bhaag jaana 

Meray bas main nahin 

Yeh soch kar 

Meri dharkanein tham jaati hain 

Aarzu'ein sulag jaati hain 

Sabhi raaha'tein seham jaati hain

agar main teri yaadon se 

Rihaai paa bhi loon 

Meri zindagi meri saan'sein jam jati hain 

Dil kisi yaar-e-ba'wafar ki tarah

Dil kisi yaar-e-ba'wafar ki tarah 

Ba'khabar hai bhout khuda ki tarah 

Zindagi bhar tumhara naam meray 

Dil se nikla kisi dua ki tarah 

Main ne her morr pe tujhay dhoonda 

Hijar kay shaher ki hawa ki tarah 

Umar bhar tera dukh uthaya hai 

Waqat ki di hui saza ki tarah 

Kuch nahin soojhta mohabbat main 

Khouf aur gham ki intihaa ki tarah