Agar tum loat aatay to tumhein lagta
Hawaein khushbuon ko le kay phoolon se
Chura kay rang titli kay paron se , gun'gunati hain
Chaman ki khushk shakhon ne gulabon aur patton ka libada orh kar
ithlaanay ki phir se ada paai
Naye andaz se dharkan ne bajnay ka hunar seekha
Mohabbat ka saleeqa tha bhout mushkil magar seekha
Kisi kay band honton pe duaein ugg rahi hain youn
keh jaisay door bhatka sa koi aahu palat kar aa gaya ghar ko
Laga , sach much kisi aabad ne sajday se uthaya sar achanak baad sadiyon kay
Aur apnay samnay mabood kay paikar ko paya , muskura utha
Zara socho, keh us ko woh gharri kaisi lagi ho gi ?
Zamane baad aisi be'khudi kaisi lagi ho gi ?
Agar tum loat aatay to . . . . . .
Magar tum loat kar aatay bhi to kaisay
Kisi ko jeetay jee tum ne chitta main khud jala dala
Mitta dala ........... bhula dala
Faqat ab raakh baqi hai
Magar janaa !
Agar tum loat aatay to............
No comments:
Post a Comment