Kabhi kabhi main sochti hoon

Kabhi kabhi main sochti hoon 

Mujh main logon ko khush rakhnay ka malka

Itna kam kiyon hai 

Kuch lafzon se , kuch meray lehjay se khafa hain 

Pehlay meri maan 

Meri masroofiyat se 

Na;laan rehti thi 

Ab yahi gila mujh se meray baitay ko hai 

( Rizaq ki andhi dor main rishtay kitnay peechay reh jaatay hain )

Jab keh surat-e-haal to yeh hai 

Mera ghar 

Meray aurat honay ki majboori ka 

Poora lutaf utha'ta hai 

Her subho 

Meray shaano par 

Zimay daari ka bojh lakin 

Pehlay se bhaari hota hai 

Phir bhi meri pushat pe 

Na'ehli ka koob 

Roz-ba-roz nu'mayan hota jata hai 

Phir mera daftar hai 

Jahan taqar'rur ki pehli hi shar kay tor pe

Khud'daari ka asteefa dakhil karna tha 

MAin banjar zehno main phool uganay ki koshish karti hoon 

kabhi kabhi hariyaali dikh jaati hai 

Warna 

Pathar 

Baarish se aksar naraaz hi rehtay hain 

Mera qabeela 

Meray harf main roshni dhoond nikalta hai 

Lakin mujh ko 

Achi tarah maloom hai 

In main 

Kis ki nazrain lafaz par hain 

Aur kis ki lafaz kay khaliq par 

Saray daairay meray paaon se chotay hain 

Lakin waqat ka wehshi naach

Kisi maqaam nahin rukta 

Raqs li lay her kamha tez hui jaati hai 

Ya to main kuch aur kahoon 

Ya phir 

YEh mera siyara nahin hai 

Parveen shakir