Kabhi mushkalon ka tha samna , kabhi raahaton main guzar gaye
Woh jo din thay meray shabaab kay teri chahaton main guzar gaye
Teri justagoo main rawaan dawaan kabhi sang thay kabhi kehkishaan
Wohi din bhi kitnay haseen thay jo musaafton main guzar gaye
Kabhi koh-o-dasht kay marhalay kahin barq thay , kahin zalzalay
Kabhi fasl-e-gul kay thay zam'zamay kabhi aafton main guzar gaye
Meray ham'damon ki nawazishein , yeh nawazishein thein ya sazishein
Woh jo roz-o-shab thay wisaal kay woh shikayaton main guzar gaye
Kabhi raaz daan ne sitam kiya , kabhi main raqeeb se ja mila
Woh jo lamhay thay meray pyaar kay woh raqabaton main guzar gaye
Kabhi dil gaya . kabhi jaan gayi , kabhi rooh badan se nikal gayi
Jo "Wazir" lamhay thay pyaar kay woh sakhawaton main guzar gaye
Poet : Wazir Gohanvi
No comments:
Post a Comment