Mohabbat ki duniya main mashoor kar doon
Meray sada dil tujh ko maghroor kar doon
Teray dil ko milnay ki khud arzoo ho
Tujhe is qadar gham se ranjoor kar doon
Mujhe zindagi door rakhti hai tujh se
Jo tu paas ho to issay door kar doon
Mohabbat ke iqraar se sharam kab tak
Kabhi samna ho to majboor kar doon
Yeh be'rangiyaan kab tak ae husan-e-rangeen
Idhar aa tujhay ishq main choor kar doon
Yu agar samnay ho to main be'khudi main
Sitaron ko sajday pe majboor kar doon
Nahin zindagi ko wafa warna "Akhtar"
Mohabbat se duniya ko mamoor kar doon
No comments:
Post a Comment