Tujhay dekhaye bina veeran ho jaata hoon
Apni haalat pe main hairaan ho jaata hoon
Dhoondta rehta hoon her chehray main tera chehra
Aur phir khud hi pashimaan ho jaata hoon
Ab kay bichray to khwabon main bhi na mil payein gay
Bas isi gham se parishaan ho jaata hoon
Jaan keh kar jo bulaatay ho to ae jaan-e-jahan
Sari duniya se main anjaan se ho jaata hoon
Likhtay likhtay teray osaaf pe nazmain humdam
Teri hasti ka main unwaan sa ho jaata hoon
Jab bhi haathon ki lakeeron pe nazar parti hai
MAin adhoora koi armaan sa ho jaata hoon
No comments:
Post a Comment