Youn to guzar raha hai her ik pal khushi ke saath
Phir bhi koi kami si hai kiyon zindagi ke saath
Rishtay wafaein , dosti sab kuch to paas hai
kiya baat hai pata nahin dil kiyon udaas hai
Her lamha hai haseen nayi dil'kashi ke saath
Phir bhi koi kami si hai kiyon zindagi ke saath
Chahat bhi hai sakoon bhi hai dil'bari bhi hai
Aankhon main khwaab bhi hain labon par hansi bhi hai
Dil ko nahin hai koi shikayat kisi ke sath
Phir bhi koi kami si hai Kiyon zindagi ke saath
Chaha tha jaisa waisa hi jeevan to hai magar
Ab aur kis talaash main be'chain hai nazar
Qudrat to meharbaan hai dariya dili ke sath
Phir bhi koi kami si hai kiyon zindagi ke saath
No comments:
Post a Comment