Inkaar kay moti , kabhi iqraar kay moti
Is dil ne proye hain , teray pyaar kay moti
Karta tha bhout dair se woh in ka taqaza
Honton se meray bikhray hain izhaar kay moti
Kartay hain asar dil pe bhout jald woh aksar
Jharray zabano se jo guftaar kay moti
Guzri hoon kai baar main gulshan ki fiza se
Yaadon main saja rakhye hain meh'kaar kay moti
Lay ayi hoon bazaar main tasneef main apni
Biktay hain yahan roz hi funkaar kay moti
IS waastay gehra hai kitaabon se taaluq
Chunti hoon shab-o-roz main afkaar kay moti
Her haal main laazim hai karain in ki hifaazat
Ta'binda sada rehtay hain kirdaar kay moti
Mehnat se traasha hai inhain main ne hameesha
HAin jaan ase pyaaray mujhay ashaar kay moti
Ab kon bhala gul se unhain cheen sakay ga
Jab dil main chupa rakaye hain dil'daar kay moti
No comments:
Post a Comment