Khuda janay tumharay zehan main kiya hai
Meray baaray main tum kiya sochti ho , keh nahin sakta
Magar main is liye milnay se katraata hoon tum se
Keh woh baatain jo hum likhtay hain
Apnay khatt main chahat se
Woh baatain aur baatain hain
Woh baatain aisi baatain hain
BAs baatain hi baatain hain
Haqeeqat mukhtalif hai aisi baaton se
Haqeeqat mukhtalif hoti nahin alfaaz likhnay se
Zubaani guftagoo se baahami izhaar-o-arz-e-haal karnay se
Bhout si aisi baatain hain
Jinhain sunnanay ko kaano ki nahin aankhon ki haajat hai
Agar tum mujh se milnay par bhout israar karti ho
To phir aik shart hai
Aik lafaz bhi kehna na honton se
Faqat aankhon se aankhain guftagoo karti hain
Khalaa apnay sawalon ka
In aankhon ki sadaein khud-ba-khud barhti rahain gi
Agar milna zaroori hai
To choti si meri yeh shart apnay zehan main rakhna
No comments:
Post a Comment