Abhi to ishq main aisa bhi haal hona hai

Abhi to ishq main aisa bhi haal hona hai

Keh ashk rokna tum se mohaal hona hai

Her aik lab par hain meri wafaon kay afsaanay

Teray sitam ko abhi la'zawaal hona hai

Tumhain khabar hi nahin , tum to loat jaao gay

Tumharay hijar main aik lamha saal hona hai

Hamari rooh pe jab bhi azaab utrain gay

Tumhari yaad ko is dil ki dhaal hona hai

Kabhi to roye ga woh bhi kisi ki baanhon main

Kabhi to us ki hansi ko zawaal hona hai

Milay gi hum ko bhi apnay naseeb ki khushiyaan

Bas intizaar hai kab yeh kamaal hona hai

Her ik shakhs chalay ga hamari raahon par

Mohabbaton main hamain woh misaal hona hai

Zamana jis kay kham-o-paich main ulajh jaye

Hamari zaat ko aisa sawal hona hai

Yaqeen hai mujh ko keh woh loat aye ga

Ussay bhi apnay kiye ka malaal hona hai