Main udaas raasta hoon shaam ka

Main udaas raasta hoon shaam ka

Mujhay aahaton ki talaash hai

Yeh sitaaray hain sab bujhay bujhay

Mujhay jugno'on ki talaash hai

Her khushi hai mujh se khafa khafa

Mujhay zindagi ki talaash hai

Meri pyaas main woh talab nahin

Mujhay tishnagi ki talaash hai

Ik hajoom sa hai rawaan dawaan

Mujhay doston ki talaash hai

Meri zindagi hai bas ik raasta

Mujhay manzalon ki talaash hai

Na'jaanay kiya hai jo kho gaya

Mujhay shayed apni hi talaash hai