Hum apni shaam ko jab nazar-e-jaam kartay hain
Adab se hum ko sitaray salaam kartay hain
Galay lagatay hain dushman ko bhi saroor main hum
Bhout buray hain magar naik kaam kartay hain
Sajaayen kiyon na issay yeh saraaye hai dil ki
Yahan haseen musafir qayaam kartay hain
HAyat baich di thoray se pyaar kay badlay
Yeh karo'baar bhi teray ghulaam kartay hain
Hamain bhi ek nazar se nawaz de saqi
Hum apnay hosh-o-khird teray naam kartay hain
Qateel kitnay sukhan saaz hain yeh sanaatay
Sakoot-e-shab main jo hum se kalaam kartay hain
No comments:
Post a Comment