Abhi kuch dair pehlay raat ne palkein jhukayi hain
Meri mutthi main ab tak
Raat ki palkon se tootay kuch sitaaray hain
Dukhon kay ista'aaray hain
Main in ko dekhta hoon to ,,,!
To meri aankhon main dhairon khwaab
Tabeeron kay dukh main koi chehra sochtay hain
Aur woh chehra
Shanasa shanasa se
Kai chehron main tabdeel ho jaata hai
Safar tehleel hota hai
Phir in chehron se yaadon kay kai manzar ubhartay hain
Nazar main raqs kartay hain
Woh chehray
Jo meri tanhaiyon kay ashk paaray hain
Mujhay her haal main khud se pyaaray hain
Sab hi chehray tumharay hain
No comments:
Post a Comment