Ek hasrat-e-Aab ho gaya hoon
Main khud hi saraab ho gaya hoon
Likha hoon ik ajnabi zubaan main
Honay ko kitaab ho gaya hoon
Ek khwaab main jee raha tha ab tak
So khwaab hi khwaab ho gaya hoon
Tha kitna saja hua yeh chehra
Aur kaisa kharaab ho gaya hoon
Ginta jo raha woh mujh ko her pal
Be'had-o-hisaab ho gaya hoon
Gohar tha kabhi dil-e-sadaf main
Ab naqsh bar aab ho gaya hoon
Karta tha sawal zindagi se
Ab apna jawaab ho gaya hoon
Tu baith kinar-e-ishq main to
Sohni ka chinaab ho gaya hoon
Ab tor liya chaman se rishta
Jungle ka gulaab ho gaya hoon
No comments:
Post a Comment