Raaston ki marzi hai
Be'zameen logon ko
Be'qaraar aankhon ko
BAd'naseeb qadmon ko
Jis taraf bhi le jayein
Raaston ki marzi hai
Be'nishaan jazeeron par
Bad'gumaan shehron main
Be'zuban mussafir ko
Jis taraf bhi bhatkaa dein
Raaston ki marzi hai
Rok lain ya barhnay dain
Thaam lain ya girnay dain
Wasal ki lakeeron ko
Tor dain ya milnay dain
Raaston ki marzi hai
Ajnabi koi laa kar
Humsafar bana daalein
Saath chalnay walon ki
Raakh bhi urra daalein
Ya musaaftein sari
Khaak main mila daalein
Raaston ki marzi hai
No comments:
Post a Comment