Sham-e-gham jab bikhar gayi ho gi
Janay kis kis kay ghar gayi ho gi
Itni larzaan na thi chragh ki lo
Apnay saaye se dar gayi ho gi
Chandani ik shab ki mehmaan thi
Subha hotay hi mar gayi ho gi
Dair tak woh kahfa rahay mujh se
Door tak yeh khabar gayi ho gi
Ik dariya kay rukh badaltay hi
Ik nadi phir utar gayi ho gi
Jis taraf woh safar pe nikla tha
Saari ronaq udhar gayi ho gi
Raat suraj ko dhoondnay kay liye
Taaba had-e-sehar gayi ho gi
Meri yadon ki dhoop chaaon main
Us ki surat nikhar gayi ho gi
Teri pal bhar ki dosti "Mohsin"
Us ko bad'naam kar gayi ho gi
Poet :~ Mohsin naqvi
No comments:
Post a Comment