Zehar-e-qaatil hai abgeeno main
Saamp paltay hain Aasteeno main
Chand qatray hain khoon-e-sa'il kay
Ab sha'inshah kay khazeeno main
Khair ho ! Aasman sitaron ki
Jag'magaye hain daagh seeno main
Inqalaab-e-hayat kya kehiye
Aadmi dhal gaye masheeno main
Meray naghmon ka jee nahin lagta
Mah paron main , meh jabeeno main
Jao ! ehal-e-khird ki mehfil main
Kya karo gay junoon nasheeno main
Moj-e-sahil ko barh kay choom aayi
Hum taraptay rahay safeeno main
Kuch farishton ka naam insaan hai
Meray ehsaas kay qareeno main
Ab sha'raron ki fasal hai "Saghar"
Rang ugtay thay jin zameeno main
No comments:
Post a Comment