Zouq-e-tugi'yan main dhal kay dekh kabhi
Moj ban kay ucchal kay dekh kabhi
Tu sadaf hai to is samandar main
Sang'rezay nigal kay dekh kabhi
Aatish-e-aarzoo ajab shai hai !
Is ki thandak main jal kay dekh kabhi
Dekh khushk sehra bhi rashk-e-gulshan hai
Apnay ghar se nikal kay dekh kabhi
Ae giraftaar-e-rehbar-o-manzil !
Be'irada bhi chal kay dekh kabhi
Zindagi ki mithaas kay ham'raah
Zehar-e-gham ko nigal kay dekh kabhi
Hai baharon ki justagoo "Saghar"
Khaar zaaron main chal kay dekh kabhi
No comments:
Post a Comment