Ae Ishq mujhay azaad kar do
Kitni hi
Zanjeerain
Dil main
No'keelay taptay aahan se bhi
Kahin ziyada chubti hain
Aur ghutan ki bojhal dewarein to
Jaisay pusht aur seenay par tameer hui hon
Ajab ajab se pachtaway
Aur bila jawaaz pash-e-mani si
Sanson aur aankhon main aksar
Pisi hui mirchon ki sulgan door door tak bhar deti hai
Be'chaini kay halqay rooh ko
Sakhti se jakray rakhtay hain
Aansoo galay ko
Andar se pakray rakhtay hain
Hijar ki jailein
Shaher ki jailon se barh charh kar
Umar da'boch liya karti hain
Jo kuch karna ho aakhir main
Pehlay soch liya karti hain
No comments:
Post a Comment