Dilon pe jabar ki tamaam hikmatein ulat gayein
Judaiyon main aur bhi rafaqatein simat gayein
Teray diyaar-e-yaad se guzar raha tha qaafla
Kahin to din palat gaye kahin shabein palat gayein
Main jis kay mohaaz pe safein badal badal gaya
Meray muqablay main teri aarzu'ein dat gayein
Judaiyon se daman-e-khayal to chura liya
Magar kai udasiyan naseeb se chimat gayein
Ajeeb waqiya hai aik din sakoot-e-shaher se
Qalam bachaa rahay thay hum keh ungliyan bhi kat gayein
No comments:
Post a Comment