Udas shamein , ujaar rastay kabhi bulaein to loat aana
Kisi ki aankhon main rat'jagon kay azab ayein to loat aana
Abhi nayi wadiyon , naye manzaron main reh lo magar meri jaan
Yeh saray ik aik kar kay jab tum ko chor jaye to loat aana
Jo shaam dhaltay hi apni apni panah'gahon ko lot'tay hain
Agar woh panchi kabhi koi dastaan suna'ein to loat aana
Naye zamano ka karb orhay zaeef lamhay nidhaal yaadein
Tumharay khawabon kay band kamron main loat ayein to loat aana
Main roz youn hi hawa pe likh likh kay us ki janib yeh bhejta hoon
Keh achay mousam agar paharon pe muskura'ein to loat aana
Agar andheron main chor kar tum ko bhool jayein tumharay sathi
Aur apni khatir hi apnay apnay diye jala'ein to loat aana
No comments:
Post a Comment