Abhi pehli mohabbat kay
Bhout se qarz baqi hain
Abhi pehli musafat ki
Thakan se choor hain paaon
Abhi pehli rafaqat ka
Her ik ghaao salamat hai
Abhi maqtool khawabon ko
Bhi dafnaya nahin hum ne
Abhi aankhein hain Id'dat main
Abhi yeh sog kay din hain
Abhi iss gham ki kafiyat se
Baahir kis tarah aayein
Abhi is gham ko bharnay do
Abhi kuch din guzarnay do
Yeh gham kay neel'goon dariya
Utar jayein to sochein gay
Abhi yeh zakham taza hain
Yeh bhar jayein to sochein gay
Dobara kab ujarna hai ????
No comments:
Post a Comment