Imran's Poetry

Jul 29, 2015

Justagoo khoye huwon ki umar bhar kartay rahay

Chand kay hum'rah hum her shab safar kartay rahay

Raaston ka ilm tha hum ko na simton ki khabar

Shaher-e-na'maloom ki chahat magar kartay rahay

Hum ne khud se bhi chupaya aur saray shaher se

Teray janay ki khabar dewaar-o-dar kartay rahay

Woh na aaye ga hamein maloom tha is shaam bhi

Intizaar us ka magar kuch soch kar kartay rahay

Aaj aaya hai hamein bhi un uraano ka khayal

Jin ko teray zoham main be'baal-o-par kartay rahay

Chalay bhi Aao

Chalay bhi Aao

Chalay bhi Aao

Keh main to khud ko tumharay rangon main rang

Chuka hoon

Tumharay sanchon main dhal chuka hoon

Tumharay kehnay pe aa kay dekho

Main khud ko kitna badal chuka hoon

Khawab nagar hai aankhein kholay dekh raha hoon

Us ko apni jaanib aatay dekh raha hoon

Kis ki Aahat qariya qariya phail rahi hai

Dewaron kay rang badaltay dekh raha hoon

Kon meray jaadu se bach kar jaa sakta hai

Aaina hoon Sab kay chehray dekh raha hoon

Darwaze par tez hawaon ka pehra hai

Ghar kay andar chup kay saaye dekh raha hoon

Jaisay mera chehra meray dushman ka ho

Aainay main khud ko aisay dekh raha hoon

Manzir manzir veerani ne jaal tany hain

Gulshan sulshan bikhray pattay dekh raha hon

Manzil manzil hole main doobi awazein hain

Rasta rasta khouf kay pehray dekh raha hoon

Shaher-e-sang'dilan main "Amjad" her rastay par

Awazon kay pathar chaltay dekh raha hoon

Bari hairat se arbaab-e-wafa ko dekhta hoon

Bari hairat se

Bari hairat se arbaab-e-wafa ko dekhta hoon

Khatta ko dekhta hoon aur saza ko dekhta hoon

Abhi kuch dair hai shayed meray mayoos honay main

Abhi kuch din faraib-e-wafa reh'numa ko dekhta hoon

Khuda maloom dil ko justagoo hai kin jazeeron ki

NA janay kin sitaron ki Zia ko dekhta hoon

YEh kya gham hai meray Ashaar ko nam kar diya jis ne

YEh dil main kis samandar ki ghatta dekhta hoon

Zameer ik qaid-e-na'mehsoos ko mehsoos karta hai

Kisi na'deed'ni zanjeer-e-paa ko dekhta hoon

Na woh khwaab hain na khayal hain koi zindagi ki sada nahin

Kya sunaaon main tum ko daastan meray paas kuch bhi raha nahin

KAbhi raaston se na'ashnaa main chala tha qurbatein dhoondnay

Mujhay manzilon ne sikha diya kuch faaslon kay siwa nahin

Kai rang thay jo bikhar gaye kuch log thay jo guzar gaye

Woh dariya saray utar gaye ab un ruton ki fiza nahin

Meray lab pe harf-e-gila nahin yeh naseeb-e-jaan kay hain silsalay

Mujhay jo mila meri be'basi meri zindagi main wafa nahin

Woh jo teray meray tha darmiyan ik khwaab tha keh saraab tha

Jo suna woh tum ne kaha nahin jo kaha woh tum ne suna nahin

Meri zindagi ki kitaab main baray hasraton kay hain tazkaray

Mera hamsafar jo kahayl tha sar-e-warq us ko likha nahin

Ab kya kahon keh woh kon tha koi saath tha meray paas tha

Mujhay yaad hai woh zara zara woh kahan gaya yeh pata nahin

Khullay paaniyon main ghirri larkiyan

Narm lejron kay cheentay uraati hui

Baat be baat hansti hui

Apnay khwabon kay shehzadon ka tazkara kar rahi thein

Jo khamosh thein

Un ki aankhon main bhi muskurahat ki tehreer thi

Door saahil pe baithi hui ik nanhi si bachi

Hamari hansi aur mojon se be'khabar

Rait se ik gharonda bananay main masroof thi

Aur main sochti thi

Khudaya ! yeh hum larkiyan kacchi umaron se hi kiyon

Khwaab dekhna chahti hain , , , , !!!

Yaadon ko sambhalay rakhna

Yaadon ko sambhalay rakhna

Ae chaand si pyaari larki

Meri yaadon ko tum zara

Sambhalay rakhna

Khud se juda na karna

KEh her guzartay lamhay kay saath

Meri yaadon ka samandar

Apnay saahil se nikalnay kay liye

Be'taab sa rehta hai

Suno ! meri yaadon ko

Khud se juda mat karna

Akelay lawn kay goonjtay sanatay main

Chandani ki mar mar'ein baarish main bheegti hui

Ik tanha afsurda larki

Apnay phailay huye haath ko takti hai

Takti hai aur sochti hai

Woh naam , , ,

Jo us kay liye raha zeest ka unwaan hai

Shariyano main jo lahu ki jaga rawan hai

Woh naam , , , ,

Jis ki chandani dasht-e-zaat pe ehsaan hai

Jis ki asaaib ab bhi wehshaton ka samaan hai

Woh naam , , , ,

In lakeeron main kahan hai ? !!

Aaj malboos main hai kaisi thakan ki khushboo

Raat bhar jaagi hui jaisay dulhan ki khushboo

Peh'rahan mera magar us kay badan ki khushboo

US ki tarteeb hai ik ik shikan ki khushboo

Qamat shair ki zaibaai ka aalam mat pooch

Mehar'baan jab se hai us sard badan ki khushboo

Zikar shayed kisi khurasheed badan ka bhi karay

Ku-ba-ku phaili hui meray gehan ki khushboo

Aariz-e-gul ko chua tha keh dhanak si bikhri

Kis qadar shokh hai nanhi si kiran ki khushboo

Aik raat ujaalo meray liye

Main so jaaon , , , tum jaago

Ik shabnam haath rakho seenay par

Lams jagay to lab mehkaao

Saans main phool khilaao

Hawa chalay to

Palkon pe taaray barsaao

Neend kay par phailay jayein

Phir khawab samandar jaago

Aik raat ujaalo meray liye

Main so jaaon tum jaago