Be'kaif zindagi kay sunsaan raastay hain
Kiya gham jahan bhar kay mere wastay hain
Na'kaamiyon kay veeraan saahil pe be'basi hai
Daaman main dukh smaitay khushiyon ko taaktay hain
Jalna tujhay hai shab bhar mujh ko bhi dard sehna
Ae shamma teray meray ik jaisay raastay hain
Nafrat ki wadiyon main bikhra wajood thaamay
Insaan to chup khara hai saye pukaartay hain
Ik baar hans ke bolo duniya ke na'khudao
Hum muntazir hain teray tum se hi maangtay hain
NA dosti pe razi , na dushmani gawara
Koi bataye mujh ko kiya log chahtay hain
Meri wafa se meray dil ka nagar hai roshan
Raaton ko bhi "Zia" hum yeh taaray baant'tay hain
Kiran Zia
No comments:
Post a Comment