Suna hai log ussay aankh bhar ke dekhtay hain

Suna hai log ussay aankh bhar ke dekhtay hain 

So us ke shaher main kuch din tehar ke dekhtay hain 

Suna hai rabt hai us ki khraab haalon se

So apnay aap ko barbaad kar ke dekhtay hain 

Suna hai dard ki gaahak hai chasham-e-naz us ki 

So hum bhi us ki gali se guzar ke dekhtay hain 

Suna hai us ko bho shair-o-shairyse shaghaf

So hum bhi mohjazay apnay hunar ke dekhtay hain 

Suna hai bolay to baaton se phool jhartay hain 

Yeh baat hai to chalo baat kar ke dekhtay hain 

Suna hai raat ussay chaand takta rehta hai 

Sitaray baam-e-falak se utar ke dekhtay hain 

Suna hai din ko ussay titliyaan statai hain 

Suna hai raat ko jugnoo tehar ke dekhtay hain 

Suna hai hashar hain us ki ghazaal si aankhain 

Suna hai us ko hiran (deer) dasht bhar ke dekhtay hain

Suna hai raat se barh kar hain ka'kalain  us ki 

Suna hai shaam ko saye guzar  ke dekhtay hain 

Suna hai us ke labon se gulaab jaltay hain 

So hum bahaar pe ilzaam dhar ke dekhtay hain

Suna hai aaiyna-e-tamsaal hai jabeen us ki 

Jo sada dil hain ussay aah bhar ke dekhtay hain 

Suna hai us ke badan ki taraash aisi hai 

Keh phool apni qubaein kutar ke dekhtay hain 

Bas ik nigah se lut'ta hai qaflaa dil ka 

So reh'waan-e-tamana bhi dar ke dekhtay hain 

rukay to gardashain us ka tawaaf karti hain 

Chalay to us ko zamanay tehar ke dekhtay hain 

Kahaniyaan hi sahi , sab mubaalgay hi sahi 

Agar woh khwaab hai tabeer kar ke dekhtay hain 

Ab us ke shaher main tehrain keh kooch kar jayein 

"Faraz" aao sitaray safar ke dekhtay hain

Poet : Ahmed Faraz