Ek sada Pukaray jaati hai
Ghannay gung'riyalay baalon wala sehzada
Waris shah kay dais ka rehnay wala
Oncha qad aur us se ooncha shamlaa
Roshan maatha aur us par iqbaal ka chaand
Bhoori aankhin aur un main sachay moti
TArshay huye lab aur mehaktay meethay bol
Kariyal aisa
Apni baanhain hathail par woh mujhay utha le
Youn chalta hai
JAisay zameen faqat us kay qadmon kay liye bani hai
Kam kam bolnay
Aur ziada dekhnay wala
Meray chaaron janib
Apnay wajood ki wanjli bajaye jata hai
Us se hazaron kos ki doori par baithi hoon
Aur phir bhi
Ik sada pukaray jaati hai
Meray naam ko saanjh saweray
Ik taan bulaye jaati hai
Mujhay pal pal takhat hazaray !
Parveen Shakir
No comments:
Post a Comment