Architect

Architect

Main architect hoon

Aur naam bhi hai moh'tabar mera

Jadeed andaaz ki takhleeq

Ik pehchaan hai meri

Ba'fazal-e-rab

Khyalon ko kamaal-e-fun muyassar hai

Buland-o-bala meenarain

Imaraat-e-haseen

Bairaaj , pull

Kiya kiya nahin shah'kaar meray

Meri takhleeq par

Hum'asar meray rashak kartay hain

Yeh sab  sach ahi

Magar mujh se kabhi

Ik hospital

Ban nahin paata

Yeh naqsha

Meray haathon se

Mukamal ho nahin paata

Bana leta hoon main sab kuch

Magar woh gosha-e-veeraan

Jo is ka juz-o-laazim hai

Woh mujh se ban nahin paata

Keh meri ungliyon se murda khana ban nahin paata