Raatain sachi hain , din jhootay hain

Raatain sachi hain , din jhootay hain

Chahye tum meri beenai khurach daalo

Phir bhi main apnay khwaab nahin choron ga

In ki lazat aur aziyat se main apna ehad nahin toron ga

Tez nazar na'beenaon ki aabadi main

Kiya main apnay dihaan ki yeh ponjhi bhi ganwa doon

Haan meray khwaabon ko tumhari sohbaton ki

sard aur saya goon tabeer

In sohbaton en shaam kay haathon

Ab tak jitnay suraj baichay

Woh sab aik barfaani bhaap ki

Chamkeeli aur chakar khaati golaai thay

So meray khwabon ki raatain

Jalti aur dehakti raatain

Aisi yak'basta tabeer kay her din se

achi hain aur sachi bhi hain

Jis main dhundla chakar khaata

Chamkeela pan 6 atraaf ka rog bana hai

Meray andheray bhi sachay hain

Aur tumharay rog ujaalay bhi jhootay hain

Raatain sachi , din jhootay

Jab tak din jhootay hain jab tak

Raatain sehna , aur apnay khwaabon main rehna

Khwaabon ko bahaanay wale

Din kay ujaalay se achay hain

Haan main beh'kaaon ki dhund se urron ga

Chahye tum meri beenai khurach daalo

Phir bhi main apnay khwaab nahin choron ga

Apna ehad nahin toron ga

YAhi to bas mera sab kuch hai

Maah-o-saal kay ghaarat gar se meri thani hai

Meri jaan par aan bani hai

Chaaye kuch ho meri aakhri saans talak ab chahye kuch ho