Kaha karti thi tum aksar mujhay ik naam aisa do

Kaha karti thi tum aksar 

Mujhay ik naam aisa do 

Pukaaro jis se tum mujh ko to youn mehsoos ho jaisay 

Tumhari shayri sari meri tareef teharti hai 

Jissay sun kar main khwaabon ki si kafiyat main kho jaaon 

Hawaon main urron jaisay 

Jisay sun kar yeh dil kiya rooh tak sarshaar ho jaye 

Jissay sun kar meri tishna labi sairaab ho jaye 

Jissay sun kar lagay aisay keh jaisay baarish phoolon ki 

Badan ki her kali jaisay be'andaaz zikar mehkay 

Jissay sun kar lagay aisay 

Keh madham se meethay surron main tairata meetha madhur naghma 

Guzartay waqat kay lamhay jissay sun kar tehar jayein 

Samaa madhosh ho jaye 

jissay sun kar bahaarain jaatay jaatay phir se loat ayein 

mujhay aik naam aisa do 

so ae meharbaan larki 

main aksar sochta hoon koi aisa naam tum ko doon 

keh jo mansoob ho tum se 

to tum ko ja'widaa kar day 

Ho koi naam aisa to 

jo mujasma-e-husan-e-fitrat ho

Bhout hi khoobsurat ho 

Kisi nazuk pari jaisa

Keh jo husan-e-jahaan rang-o-boo ka ista'aara ho 

Teray malkooti paikar ko magar tashbeeh kis se doon 

Agar main gul kahoon tum ko ?

Magar phool to murjhaa kay aksar sookh jaatay hain 

Kahoon qos-e-qaza lakin ?

Sabhi rang ikhatay mil kar bhi 

Teri rooh se chalakti noor ki kirno ko na ponchay 

Hina ka naam doon tum ko?

MAgar rang-e-hina to chaar din main rooth jaata hai 

Agar baadal kahoon tum ko ?

Ghataaon se siwa lakin teray jazbaat ki shiddat hai 

Tumhain sawan kahoon kaisay ?

Tumharay pyaar ki baarish to her mousam barsaati hai 

Naseem-e-subha keh doon ya kahoon baad-e-saba tum ko ?

Magar fitrat hawa ki to azal se be'wafai hai 

Teri waraftagi sochon , samandar ki lehar keh doon ?

MAgar mojon ki tughyaani to ik poonam ki shab tak hai 

Teri aamkhain agar sochon , tumhain meh kay baadal keh doon 

Khumaar-e-meh to lakin raat bhar ki baat hoti hai 

Agar saya kahoon , jhonka kahoon , khushboo kahoon tum ko ?

Magar tum to mujasma ho 

Bhout kuch sochta hoon main 

Tumhara naam kiya rakhon ?

Kahoon jaadoo , chragh-e-raah ya manzil kahoon tum ko ?

Kahoon main justagoo , koshish kahoon ya dil kahoon tum ko ?

Shafaq keh doon , sehar keh doon , ya keh doon chandani tum ko ?

Agar khwaish kahoon ya arzoo ya zindagi tum ko ?

Agar sahir kahoon , nasha kahoon ya be'khudi tum ko  ?

Ada keh doon , wafa keh doon , haya keh doon agar tum ko ?

Agar sahil kahoon , kashti kahoon , ya na'khuda tum ko ?

Agar taqdeer ya inaam ya qismat kahoon tum ko ?

Agar guncha kahoon , laala kahoon , nargis kahoon tum ko ?

Kahoon main jaan ya jaan-e-jaan tum ko ?

Agar jharna kahoon , dariya kahoon , sagar kahoon tum ko ?

Kiran keh doon , ghata keh doon ya phir rim jhim kahoon tum ko ?

Agar jugnoo kahoon , shola kahoon , shabnam kahoon tum ko ?

Agar sheesha kahoon , moti kahoon , resham kahoon tum ko ?

Yeh saaray naam teri zaat kay pehlu sahi lakin 

Magar jajta nahin koi yeh saaray naam faani hain 

Tumhara naam aisa ho 

Jo tum ko ja'widaa kar day 

Tumhain poora bayaan kar day 

Suno ae meharbaan larki 

Bhout hi soch kar main ne 

Tumhara naam rakha hai 

Mohabbat , naam kaisa hai ?

Mohabbat jo kabhi marti nahin