Kuch to ae yaar ilaaj-e-gham-e-tanhai ho

Kuch to ae yaar ilaaj-e-gham-e-tanhai ho
Baat itni bhi na barh jaye keh ruswai ho

Doobnay walay to aankhon se bhi kab niklay hain
Doobnay kay liye laazim nahin gehrai ho

Jis ne bhi mujh ko tamasha sa bana rakha hai
Ab zaroori hai wohi shakhs tama'sha'i ho

Main tujhay jeet bhi tohfay main nahin de sakta
Chahata yeh bhi nahin hoon teri paspaai ho

Aaj to bazam main her aankh thi purnam jaisay
Dastaan meri kisi ne yahan doh'raai ho

Koi anjaan na ho  shaher-e-mohabbat ka makeen
Kaash her dil ki her ik dil se shna'saai ho

Youn guzar jaata hai Imran teray koochay se
Tera waqif na ho jaisay koi sodaai ho