Shaam kay saaye jo pairron se utar jaatay hain
Hum bhi chaltay huye phir teray nagar jaatay hain
Loat kar aatay hain jab raat gaye hum ghar ko
Paaon dehleez pe rakhtay hain to mar jaatay hain
Baith jaatay hain yahin ajnabi pairron main kahin
YEh prinday bhi kahan loat kay ghar jaatay hain
Door tak phaila hua had-e-nazar sehraa hai
Is kay rastay kissay maloom kidhar jaatay hain
Roz tarkeeb banaata hoon ussay paanay ki
Roz bekaar meray saray hunar jaatay hain
Jo bhi ho tum se bicharna hai magar teray liye
Tu jahaan kehta hai chal hum bhi udhar jaatay hain
Kis qadar sehmay huye log hain is basti main
Apna saaya bhi nazar aaye to dar jaatay hain
Saans qayem hain to phir chaltay raho tum bhi "Aqeel"
Sookh jaatay hain woh dariya jo tehar jaatay hain
No comments:
Post a Comment