Lutf woh ishq main paaye hain keh jee jaanta hai
Ranj bhi aisay uthaye hain keh jee jaanta hai
Jo zamanay kay sitam hain woh zamanay jaanein
Tu ne dil itnay sataye hain keh jee jaanta hai
Muskuraatay huye woh majmaa-e-aghiyaar kay saath
Aaj youn bazm main aaye hain keh jee jaanta hai
Kaaba-o-dair main pathraa gayein dono aankhein
Aisay jalwe nazar aaye hain keh jee jaanta hai
Dosti main teri dar'paish hamaray dushman
Iss qadar apnay paraaye hain keh jee jaanta hai
Daagh-e-waa'rafta ko hum aaj teray koochay se
Is tarah kheench kay laye hain keh jee jaanta hai
No comments:
Post a Comment