Mujhay tum yaad aatay ho

Mujhay tum yaad aatay ho 

Kisi sun'saan sapnay main chuppi khwaish ki hiddat main 

Kisi masroofiyat kay mor par

Tanhai kay sehraon main 

Ya phir kisi anjaan be'maari ki shiddat main 

Mujhay tum yaad aatay ho 

Kisi bichray huye ki chasham par namkay nazaray par

Kisi beetay huye din ki thakan ki oat se

Ya phir tumharay zikar main guzri hui shab kay isharay par 

Kisi basti ki ba'ronaq sarak par

Aur kisi dariya , kisi veeran jungle kay kinaray par 

Mujhay tum yaad aatay ho 

Meri chup kay kuwen main 

Aarzo'on kay badan jab tairtay hain 

Aur kinaray se koi bolay 

To lagat hai ajal awaz deti hai 

Meri be'chainiyon main jab tumhari tund khor bakah khatakti hai 

Tumhari be'sabab doori sulagti hai 

Ya phir jab bhi meri aankhon kay sehra main 

Tumhari yaad ki tasveer jalti hai , judai haath malti hai 

Mujhay tum yaad aatay ho 

Mujhay tum yaad aatay ho 

Muqaddar kay sitaron par 

Zamano kay isharon par 

Udasi kay kinaron par 

Kabhi veeran shehron main  

Kabhi sun'saan raston par 

Kabhi hairaan aankhon main 

Kabhi be'jaan lamhon apr 

Mujhay tum yaad aatay ho 

Sohani shaam ho koi 

Kahin bad'naam ho koi 

Bhalay gul'faam ho koi 

Kisi kay naam ho koi 

Mujhay tum yaad aatay ho 

Kahin barish baras jaye 

Kahin sehra taras jaye 

Kahin kaali ghatta utray 

Kahin baad-e-saba thehray 

Tumharay aur meray darmiyan aa kar khuda thehray 

To meri zindagi kay awal-o-aakhir 

Tum us lamhay 

Khuda kay baad aatay ho 

Mujhay tum yaad aatay ho