Dil kitna aabaad hua jab deed kay ghar bar'baad huye
Woh bichra aur dhiyaan main us kay so mousam ijaad huye
Na'moori ki baat digar hai warna yaaro socho to
Gagoon ab tak kitnay taishay be'khoon-e-farhaad huye
Layein kahan se bol raseelay honton ki na'daari main
Samjho aik zamana guzra boson ki imdaad huye
Tum meri ik khud masti ho main hoon tumhari khud beeni
Rishtay main is ishq kay hum tum dono be'buniyaad huye
Mera kya ik moj-e-hawa hoon par youn hai ae ghuncha-e-dehan
Tu ne dil ka baagh jo choora ghunchay be'ustaad huye
Ishq mohalay main ab yaaro kya koi mashooq nahin
Kitnay qaatil mousam guzray shor huye fariyaad huye
Barq kya hai aks-e-badan ne teray hamein ae tang qaba
Teray badan pe jitnay til hain teray hum ko yaad huye
Tu ne kabhi socha ho ga , socha bhi ae mast adaa
Teray adaa ki abaadi par kitnay ghar bar'baad huye
Jo kabhi bhi rudaad-e-sukhan thi honton ki doori se thi
Jab honton se hont milay to yak dam be'rudaad huye
Khaak nasheeno se koochay kay kya kya nakhoot kartay hain
Jaan-e-jaana ! teray darbaan to firon-o-shadaad huye
Shaheron main hi khaak uraa lo shor macha lo be'halo
Jin rishton ki soch rahay ho kab kay bar'baad huye
Simton main bikhri woh khilwat , woh dil ki rang abaadi
Yehni woh jo baam-o-dar thay yak'sar gard'baad huye
Tu ne rindon ka haq maara meh'khanay main raat gaye
Shaikh kharray sayed hain hum to , hum ne suna na'shaad huye
No comments:
Post a Comment