Woh jo apnay makaan chor gaye

Woh jo apnay makaan chor gaye 

Kaisay duniya jahan chor gaye 

Ae zameen-e-wisaal log teray 

Hijar ka aasmaan chor gaye 

Teray koochay kay rukhsati jaana 

Sari duniya ka dhiyaan chor gaye 

Roz-e-maidaan woh teray teer andaaz

Teer lay kar kamaan chor gaye 

"Jon" laalich main aan baan ki yaar 

Apni sab aan baan chor gaye 

Jab teri khawaish kay badal chatt gaye

Jab teri khawaish kay badal chatt gaye 

Hum bhi apnay saamnay se hatt gaye 

Rang-e-sar'shari ki thi jin se rasad 

Dil ki in faslon kay jungle katt gaye

Ik charaghan hai hawas main dair main 

Jashan us ka hai dil-o-jaan batt gaye 

Shaher-e-dil aur shaher-e-duniya alwida

Hum to dono taraf se hi katt gaye 

Ho gaya sakta khird mandon ko jab 

Maat khaatay hi dewanay datt gaye 

Chand suraj kay alam aur wapsi 

Woh hua maatam kay seenay phatt gaye 

Main dil ki sharaab pee raha hoon

Main dil ki sharaab pee raha hoon 

Pehlu ka azaab pee raha hoon 

Main apnay kharaba-e-ibas main 

Be'tarah khawaab pee raha hoon 

Hai mera hisaab-e-be'hisaabi 

Dariya main saraab pee raha hoon 

Hain sokhta meray chasham-o-maz'da'gaan

Main shola-e-khawaab pee raha hoon 

Daanton main hai meray sheh'rag-o-jaan

Main khoon-e-shabaab pee raha hoon 

Main apnay jiger ka khoon kar kay 

Aye yaar shataab pee raha hoon 

Main shola-e-lab se kar kay siyaal 

Ta'oos-o-rubaab pee raha hoon 

Woh lab hain bala kay zehar Agahein 

Main jin ka la'aab pee raha hoon   

Woh ehal-e-haal jo khud raftagi main aaye thay

Woh ehal-e-haal jo khud raftagi main aaye thay 

Bala ki haalat-e-shoredagi main aaye thay 

Kahan gaye kabhi in ki khabar to lay zaalim 

Woh be'khabar jo tairagi main aaye thay 

Gali main apni gila kar hamaray aanay ka 

Keh hum khushi main nahin sar khushi main aaye thay 

Kahan chalay gaye Ae fasal-e-rang-o-bu woh log 

Jo zard zard thay aur sabzagi main aaye thay 

Nahin hai jin kay sabab apni jaan'bari mumkin 

Woh zakham hum ko guzishta sadi main aaye thay 

Tumhein hamari kami ka khayal kiyon aata 

Hazaar heef hum apni kami main aaye thay 

Koi bhi kiyon mujh se sharminda hua

Koi bhi kiyon mujh se sharminda hua 

Main hoon apnay tor ka haara hua 

Dil main hai meray kai chehron ki yaad 

Jaan'iye main kis se hoon rootha hua 

Shaher main aaya hoon apnay , aaj shaam 

Ik sara'aye main hoon main thehra hua 

Be'taluq hoon ab apnay dil se bhi 

Main ajeeb aalam main be'duniya hua 

Hai ajab ik tairagi dar tairagi 

Keh'kisha'on main hoon main lipta hua 

Maal bazar-e-zameen ka tha main "Jon"

Aasmano main mera soda hua 

Ab hai mera karb-e-zaat Aasaan bhout 

Ab to main us ko bhi hoon bhula hua  

Kar liya khud ko ja tanha main ne

Kar liya khud ko ja tanha main ne 

Yeh hunar kis ko dikhaya main ne 

Woh jo tha us ko mila kya mujh se

Us ko to khawab hi samjha main ne 

Dil jalana koi haasil to na tha 

Aakhir kaar kya kiya main ne 

Daikh kar us ko hua mast aisa 

Phir kabhi us ko na daikha main ne 

Shouq-e-manzil tha bulata mujh ko 

Raasta tak nahin dhoonda main ne 

Ik palak tujh se guzar kar , ta umar 

Khud tera waqat guzara main ne 

Ab kharra soch raha hoon logo !

Kiyon kiya tum ko ikhat'tha main ne 

Khawab kay rang dil-o-jaan main saja'ye bhi gaye

Khawab kay rang dil-o-jaan main saja'ye bhi gaye 

Phir wohi rang ba sad tor jala'ye bhi gaye 

In hi shehron ko shatabi se lapeta bhi gaya 

Jo ajab shouq-e-farakhi se bichaye bhi gaye 

Bazam-e-shokhi ka kisi ki , kahein kya haal-e-jahan 

Dil jalaye bhi gaye aur bichaye bhi gaye 

Pushat matti se lagi jis main hamari logo !

Ussi dangal main hamein da'o sikhaye bhi gaye 

Yaad-e-ayaam keh ik mehfil-e-jaan thi keh jahan 

Haath kheenchay bhi gaye aur milaye bhi gaye 

Hum keh jis shaher main thay sog nasheen-e-ehwaal 

Roz us shaher main hum dhoom machaye bhi gaye 

Yaad mat rakhiyo ru-daad hamari har'giz

Hum thay woh taaj mehal "Jon" jo dhaaye bhi gaye 

Dil jo ik jaye thi duniya hui abaad us main

Dil jo ik jaye thi duniya hui abaad us main 

Pehlay suntay thay keh rehti thi koi yaad is main 

Woh jo tha apna gumaan aaj bhout yaad aaya 

Thi ajab rahat-e-azadi ijaad is main 

Aik hi to woh mo'him thi jissay sar karna tha 

Mujhay haasil na kisi ki hui imdaad is main 

Aik khushbu main rahi mujh ko talash-e-khad-o-khaal 

Rang faslein meri yaaro hui'ein bar'baad is main 

Baagh-e-jaan se tu kabhi raat gaye guzra hai 

Kehtay hain raat main khel'ein hain pari zaad is main 

Dil mohallay main ajab aik qafas tha yaaro 

Said ko chor kay rehnay laga siyaad is main 

Ghar se hum ghar tak gaye hon gay

Ghar se hum ghar tak gaye hon gay 

Apnay hi aap tak gaye hon gay 

Hum jo ab aadmi hain , pehlay kabhi 

Jaam hon gay chalak gaye hon gay 

Woh bhi ab hum se thak gaya ho ga 

Hum bhi ab us se thak gaye hon gay

Shab jo hum se hua muaaf karo 

Nahin pee thi behak gaye hon gay 

Kitnay hi log hirs-e-shohrat main 

Daar par khud latak gaye hon gay

Hum to apni talaash main aksar 

Az samaa tak simak gaye hon gay 

"Jon" Allah aur yeh aalam 

Beech main hum atak gaye hon gay 

Tum se jaanam aashqui ki jaye gi

Tum se jaanam aashqui ki jaye gi 

Aur haan yak-baar'gi ki jaye gi 

Kar gaye hain kooch us koochay kay log

Ab to bas awargi ki jaye gi 

Tum sara'pa-e-husan ho , naiki ho tum 

Yehni ab tum se badi ki jaye gi 

Yaar us din ko kabhi aana nahin 

Phool jis din woh kali ki ho jaye gi 

Us se mil kar be'tarah ro'on ga main 

Aik tarfa tar khushi ki jaye gi 

Hai risaai us talak dil ka ziyaan 

Ab to yaran se na'rasi ki jaye gi 

Aaj hum ko us se milna hi nahin 

Aaj ki baat aaj hi ki jaye gi 

Hai mujhay ehsaas ko karna halaak 

Yeh'ni ab to be'hissi ki jaye gi 

Kabhi kabhi to bhout yaad aanay lagtay ho

Kabhi kabhi to bhout yaad aanay lagtay ho 

Keh rooth'tay ho kabhi aur mana'nay lagtay ho 

Gila to yeh hai tum aatay nahin kabhi lakin 

Jab aatay bhi ho to foran hi janay lagtay ho 

Yeh baat "Jon" tumhari mazaq hai keh nahin 

Keh jo bhi ho ussay tum aazmanay lagtay ho 

Tumhari shairy kya hai bhala , bhala kya hai 

Tum apnay dil ki udaasi ko gaanay lagtay ho 

Suna hai keh'kishano main roz-o-shab hi nahin 

To phir tum apni zuban kiyon jalanay lagtay ho 

Khud main hi guzar kay thak gaya hoon

Khud main hi guzar kay thak gaya hoon 

Main kaam na kar kay thak gaya hoon 

Ooper se utar kay taza dam tha 

Neechay se utar kay thak gaya hoon 

Ab tum bhi to jee kay thak rahay ho 

Ab main bhi to mar kay thak gaya hoon 

Ab jaan kay mera jisam shall hai 

Main khud se hi dar kay thak gaya hoon 

Gham hai be'maajra kai din se

Gham hai be'maajra kai din se 

Jee nahin lag raha kai din se

Be'sameem-e-malaal-o-hairaan hai 

Khaima gaah hai saba kai din se

Dil mohallay ki us gali main bhalla 

Kiyon nahin ghull maccha kai din se

Woh jo khushbu hai us kay qaasid ko 

Main nahin mil saka kai din se

Us se bhi aur apnay aap se bhi 

Weham hain be'wasta kai din se