Mujh ko ruswa sar-e-mehfil tu na karwaya karay
Kaash aansu meri aankhon main hi reh jaya karay
Ae hawa main ne to bas uss ka pata poocha tha
Ab kahani tu na her baat ki ban jaya karay
Bas bhout daikh liye khawaab sohanay din kay
Ab woh baaton ki rafaqat se na behlaya karay
Ik museebat to nahin tooti so ab iss dil se
Jis qayamat ne guzarna hai guzar jaya karay
Dil ne ab soch liya hai keh zaalim duniya
Jo bhi karna hai karay mujh ko na uljhaya karay
Jis kay khawabon ko main aankhon main saja kar rakhon
Uss ki khushbu kabhi mujh ko bhi mehkaya karay
No comments:
Post a Comment