Imran's Poetry: April 2017

Apr 30, 2017

Yeh ilm hai woh zulm hi dhaa'ein gay umar bhar

Mola tu phir bhi zindagi unn ki daraz kar

Siyah zulf ko jo ban sanwar kay daikhtay hain

Safaid baal kahan apnay sar kay daikhtay hain

Suna hai fees hai kuch uss kay baat karnay ki

Yeh fees kya hai abhi baat kar kay daikhtay hain

Suna hai log siyah faam mah'jabeeno ko

Laga kay dhoop main chashmay nazar kay daikhtay hain

Suna hai jaib main muflis bhi maal rakhtay hain

So muflis ki bhi jaibein katar kay daikhtay hain

Suna hai shouq hai un ko bhi ghurr sawari ka

Jo door se kharray ghamzay shatar kay daikhtay hain

Suna hai apni baseerat pe naaz hai unn ko

Jo raat ko bhi ujaalay sehar kay daikhtay hain

Suna hai ishq main mushkil hai matric karna

Result kuch bhi sahi form bhar kay daikhtay hain

Adeeb-o-shair-o-fun'kaar botay hain jo shajar

Yeh log phall nihaan apnay shajar kay daikhtay hain

Suna hai marnay kay baad uss ki qadar hoti hai

So chand din kay liye hum bhi mar kay daikhtay hain

Qaid main guzar gayi jo umar baray kaam ki thi

Par main kya karti keh zanjeer teray naam ki thi

Kya aisa nahin ho sakta Achanak tum chalay aayo

Kya aisa nahin ho sakta

Achanak tum chalay aayo

Suno......

Ab saans ki aamd-o-raft dushwaar lagti hai

Mohabbat ki zubaan se zindagi be'zaar lagti hai

Wafa ki yaad main her ik nigah ashk baar lagti hai

Yeh kaisi raat hai aankhon main jo bay'daar lagti hai

Kya aisa ho nahin sakta

Achanak tum chalay aayo ......

Haan yeh mousam to woh hai

Sar'shari

Haan yeh mousam to woh hai

Keh jis main nazar chup rahay

Aur badan baat karta rahay

Uss kay haathon kay shabnam payalon main

Chehra mera

Phool ki tarah hal'koray leta rahay

Pankhrri pankhrri

Uss kay boson ki baarish main

Peham nikharti rahay

Zindagi iss junoon khez baarish kay shano par sar ko rakhay

Raqs karti rahay !

Abhi to hum nahin bolay

Abhi to hum nahin bolay

Abhi to aap hain

Aur aap ka zor-e-khitabat hai

Bhout alfaaz hain na'dir

Bhout be'sakhta jumlay

Abhi to lab kushaai aap ki

Apni gawahi hai

Abhi to aap hain zil-e-ilahi

Aap hi ki baad'shahi hai

Abhi to ilm-o-hikmat

Lafz-o-gohar aap hi kay hain

Abhi sab faisalay

Sab mehr-o-mehzar aap hi kay hain

Abhi sab zar , jawahir , maal-o-doulat

Aap hi kay hain

Abhi sab asbaab-e-shohrat

Aap hi kay hain

Abhi kya hai

Abhi to aap ka jabroot

Lehjay main ayaan ho ga

Abhi to aap hi kay natq-o-lab se

Aap ka qissa biyaan ho ga

Abhi to mohtram bas aap hain

Khud apni nazron main

Mo'azam , moh'tashim alqaab hain

Khud apni nazron main

Abhi to goonjti oonchay sur'ron main

Aap hi hain madah khawan apnay

Sabhi lutf-o-karam ghar kay

Makaan-o-la'makaan apnay

Abhi to aap hi kehtay hain

Kitna khoob kehtay hain

Jo dil main aaye kehtay hain

Ho jo matloob kehtay hain

Magar jab aap ki seerat pe

Saro guftagoo ho lay

To yeh bhi yaad rakhiye ga

Abhi to hum nahin bolay

Poet : Peerzada Raza Qasim

Kisi ki aankh kay aansu mujhay ronay nahin detay

Kisi ki aankh kay aansu

mujhay ronay nahin detay

Kisi kay bheegtay lehjay

Mujhay khonay nahin detay

Kisi kay reshmi gaysu

Mujhay sonay nahin detay

Mujhay her pal sata'tay hain

Mujhay her dam jagaatay hain

Kabhi jo oongh jaaon to

Kisi dam bhool jaon to

Kisi ki narm si aahat

Kabhi anjaan lagti hai

Kabhi paighaam lagti hai

Bhala sa naam lagti hai

Kabhi ronay nahin deti

Kabhi sonay nahin deti

Magar yeh sach meri jaana !

Tujhay main ne nahin jaana

Magar aansu jo behtay hain

Jinhein hum aam sehtay hain

Bhout takleef detay hain

Kabhi tootein jo nazron se

Kabhi chootein jo palkon se

Bhout hasaas lagtay hain

Kisi ki aas lagtay hain

Magar jab gir hi jayein to

Zameen main mitt hi ho jayein to

Kisi ko kuch nahin hota

Magar phir kuch nahin rehta

Magar jab ho kabhi aisa

Kisi ki aankh kay aansu

Meri jab aankh main aayein

To phir main

Main nahin rehta

Mera phir dil yeh kehta hai

Kisi seepi main band ho kar

Banu moti ki surat main

Dhalon matti ki surat main

Kisi ki aankh ka aansu

Bahay jab aankh se meri

Laga de aag hasti main

Rahoon phir kiyon uss basti main

Jissay sab log kehtay hain

"Mohabbat Lok: kehtay hain

Koi jo aankh pur'nam hai

Koi jo zulf barham hai

Yeh sab meri wajah se hai

Yeh jo aansu chalaktay hain

Meray dil main dehaktay hain

Ussi dam hum behaktay hain

Magar yeh sarhadein jaana

Hamaray beech main hayel

Karein kaisay unhein qayel

Jo hum ko rog detay hain

Milan ko jog detay hain

Yeh aansu kab hamaray hain

Yeh aansu log detay hain

Yeh aansu log detay hain .....!!

Aaj kal sach poochiye to muskurata kon hai

Khud faraibi hai faqat , hansta hansaata kon hai

Meri neendein urr gayi hain yeh to keh sakta hoon main

Yeh magar mat poochiye neendein uraata kon hai

Tum nahin aatay na aayo , tum se shikwa bhi nahin

Tum se kehta kon hai , tum ko bulaata kon hai

Tum nahin suntay agar afsana-e-gham , mat suno

Her kas-o-na'kas ko afsana sunata kon hai

Iss se pehlay bhi kiya hai hum ne unn ka aaitabaar

Aisay waday to bhout hotay hain aata kon hai

Unn ki mehfil daikhnay ka shouq to hum ko bhi hai

Hum wahan jaatay , magar hum ko bulaata kon hai

Fitna haye dehar kay Iqbal shaaki hain sabhi

Inn se yeh poochay koi fitnay jagata kon hai

Kabhi jo ehad-e-wafa meri jaan teray meray darmiyan tootay

Main chahata hoon keh uss se pehlay zameen pe yeh aasman tootay

Teri judai main hoslon ki shakist dil pe azaab thehri

Keh jaisay munh'zor zal'zalon ki dhamak se koi chitaan tootay

Ussay yaqeen tha keh uss ko marna hai phir bhi khawaish thi uss kau dil main

Keh teer chalnay se paish'tar hi dast-e-dushmana main kamaan tootay

Woh sang hai to girray bhi dil par woh aaina hai to chubh hi jaye

Kahin to mera yaqeen bikhray , kahin to mera gumaan tootay

Ujaar pan ki udaas rutt main ghazal to Mohsin ne chairr di hai

Kissay khabar hai keh kis kay masoom dil pe ab kay yeh taan tootay

Maqrooz kay bigray huye halaat ki maanind

Majboor kay honton pe sawalaat ki maanind

Dil ka teri chahat main ajab haal hua hai

Sailaab se bar'baad makanaat ki maanind

Main un main bhataktay huye jugnu'on ki tarah hoon

Uss shakhs ki aankhein hain kisi raat ki maanind

Dil roz sajata hoon main dulhan ki tarah se

Gham roz chalay aatay hain baraat ki maanind

Ab yeh bhi nahin yaad keh kya naam tha uss ka

Jis shakhs ko maanga tha manajaat ki maanind

Kis darja muqqadas hai teray qurb ki khawaish

Masoom se bachay kay khayalaat ki maanind

Uss shakhs se milna mera mumkin hi nahin hai

Main pyaas ka sehraa , woh barsaat ki maanind

مقروض کے بگڑے ہوئے حالات کی مانند
مجبور کے ہونٹوں پہ سوالات کی مانند
دل کا تیری چاہت میں عجب حال ہوا ہے
سیلاب سے برباد مکانات کی مانند
میں ان میں بھٹکے ہوئے جگنو کی طرح ہوں
اس شخص کی آنکھیں ہیں کسی رات کی مانند
دل روز سجاتا ہوں میں دلہن کی طرح سے
غم روز چلے آتے ہیں بارات کی مانند
اب یہ بھی نہیں یاد کہ کیا نام تھا اس کا
جس شخص کو مانگا تھا مناجات کی مانند
کس درجہ مقدس ہے تیرے قرب کی خواہش
معصوم سے بچے کے خیالات کی مانند
اس شخص سے ملنا محسن میرا ممکن ہی نہیں ہے
میں پیاس کا صحرا ہوں وہ برسات کی مانند