Kuch ujaala sa rah guzar main raha

Kuch ujaala sa rah guzar main raha 

Koi jab tak meri nazar main raha 

Ik parao pe ruk gaya woh bhi 

Main akela hi phir safar main raha 

Kho gaya door ki uraano main 

Zor bhi kuch na baal-o-par main raha 

Itni muddat kay baad kya loat'ein 

Ab sha'nasa na koi ghar main raha 

Le chala dagh-e-dil nihaan dil main 

Kaisi duniya-e-be'basar main raha  

Do bhaid bharri aankhein

Do bhaid bharri aankhein 

Ik khawab ki chilman se her raat mujhay daikhein 

Do bhaid bharri aankhein 

Her subha ko chiriyon ki cheh'kaar main dhal jayein 

Phoolon ki qaba pehnein 

Shabnam main badal jayein 

Her shaam hawaon se ehwaal mera poochein 

Do bhaid bharri aankhein 

Karti hain ajab baatein kajal ki zuban se yeh 

Dil leti chali jayein andaz-e-biyan se yeh 

Do bhaid bharri aankhein 

Ik khawab ki chilman se her raat mujhay daikhein 

Do bhaid bharri aankhein 

Mata-e-shaam-e-safar bastiyon main chor aaye

Mata-e-shaam-e-safar bastiyon main chor aaye 

Bujhay chragh hum apnay gharon main chor aaye 

Bichar kar tujh se chalay hum to ab kay youn hua 

Keh teri yaad kahin raaston main chor aaye 

Hum apni dar-badri kay musha'hiday  aksar !!

Naseehaton ki tarah kam'sino main chor aaye 

Khiraaj-e-sil-e-bala iss se barh kar kya ho keh log 

Khullay makaan bharri baarishon main chor aaye 

Hamaray baad bhi ronaq rahay gi maqtal main 

Hum ehal-e-dil ko baray hoslon main chor aaye 

Urrein gay kya woh prinday jo apnay rizq samait 

Safar ka shouq bhi tootay par'ron main chor aaye 

Sada sukhi rahein chehray woh hum jinhein "Mohsin"

Bujhay gharon ki khulli khirkiyon main chor aaye

Meri eid ka taluq teri deed se raha hai

Meri eid ka taluq teri deed se raha hai 

Na hui deed teri na hui hai eid meri

Uss ki aankhon ki sur'khiyan de rahi hain pata

Uss ki aankhon ki sur'khiyan de rahi hain pata 

Keh raat uss ne bhi jaag kay guzari thi

Khiltay huye gulaab achay lagtay hain

Khiltay huye gulaab achay lagtay hain 

Khoobsurat chehron pe hijaab achay lagtay hain 

Tera na milna mera naseeb hi sahi

Tera na milna mera naseeb hi sahi 

Lakin 

Meri qismat main likha hai 

Tujhay toot kay chahana

Tumharay aur meray rishtay ka koi naam to ho ga

Be'naam rishta 

Tumhein kaisay pukaron main 

Tumharay aur meray rishtay ka koi naam to ho ga 

Adhooray un'kahay rishton ka koi naam hota hai ?

Sabhi logon ka , rishton ka koi ik naam hota hai 

Wohi pehchaan hota hai 

Keh jis ko bhi bulaana ho , ussi se hum bulaatay hain 

Koi poochay agar mujh se 

Tumhein main kya bulaati hoon 

To bolo kya bata'on main ?

Mohabbat , payar , ya phir dost bolon main 

Magar yeh saray rishtay , naam to apno kay hotay hain 

Jo dukh main aur khushi main bas hamaray saath hotay hain 

Inhein maloom hota hai keh kis lamhay hamein in ki zaroorat hai 

Kisi dukh main hamein inn ko bulana hi nahin parta 

Woh khud hi paas hotay hain 

Magar tum na khushi main saath thay meray 

Na apnay hi diye dukh main abhi bhi paas ho meray 

Aur apnay to kisi ko dooriyan de kar nahin jatay 

Na apnay naam ki ruswaiyon main chor jatay hain 

Koi poochay agar mujh se 

To bolo kya bata'on main 

Tumharay aur meray rishtay ka koi naam to ho ga 

Teri yaad ki girift aksar mujhay

Teri yaad ki girift aksar mujhay 

Apnay haathon ki lakeeron main 

Uljhaa deti hai 

Kuch hum bhi thak gaye hain ussay dhoondtay huye

Kuch hum bhi thak gaye hain ussay dhoondtay huye 

Kuch zindagi kay paas bhi mohlat hi nahin rahi 

Uss ki aik aik adaa se jhalaknay laga khaloos 

Jab hum ko aaitabar ki aadat na rahi 

Uss ne apni ungliyon se

Aansu 

Uss ne apni ungliyon se 

aik aik kar kay 

apnay saray aansu 

samait liye 

aur socha keh 

ashk samaitnay wala 

Aaj itnay ashk kaisay de gaya 

Chand raat ko sabhi daikhein hilal eid ko

Chand raat ko sabhi daikhein hilal eid ko

Ik hamara hi naseeba hadiyan turwa gaya 

Hum thay chand kay nazaray main khoye huye 

Bas achanak chand ka abaa wahan aa gaya 

Bin daikhay ussay Ya-Rab yeh eid na guzray

Bin daikhay ussay Ya-Rab yeh eid na guzray 

Kar paida koi sabab yeh eid na guzray 

Duniya ko dikhaya hai ik chand jo tu ne 

Mujh ko bhi dikhaa de ab yeh eid na guzray 

Meri banjar si aankhon se Koi dhoka nahin khao

Meri banjar si aankhon se

Koi dhoka nahin khao 

Keh tum kab daikh sakti ho 

Meray dil main chuppay ghaao

Ae meray kam sukhan sathi 

Tumhein shayed khabar ho gi 

Mohabbat main jo behtay hain 

Woh aansu khushk hotay hain  !!

Bhout kuch soch kar

Bhout kuch soch kar 

Aaj bhout kuch jaan kar 

Saray dukh sari khushiyan 

Apna din apni raat apni chahat 

Apni awargi , apni dewangi , apni muskurahat 

Sab kuch somp raha hoon 

Main tumhein apna dil somp raha hoon

Yeh sheeshay yeh sapnay yeh dhaagay

Yeh sheeshay yeh sapnay 

yeh dhaagay

Kissay kya khabar keh 

Kahan toot jayein 

Mohabbat kay dariya main 

Tinkay yeh wafa kay 

Janay kis morr par 

Doob jayein 

Rafta rafta bujh hi gaya aakhir chragh aarzu ka

Rafta rafta bujh hi gaya aakhir chragh aarzu ka 

Pehlay dil khamosh tha , ab zindagi khamosh hai 

Goonjon ga teray zehan kay gumbad main raat din

Goonjon ga teray zehan kay gumbad main raat din 

Tu bhula na sakay jissay aisi guftagoo hoon main 

Shaher bhar main jis ne ruswa kiya

Shaher bhar main jis ne 

Ruswa kiya hamein be'wafa kay naam par 

Khud uss ka daman 

Wafa se khaali tha ....!

Barishon kay mousam main

Barishon kay mousam main 

Barishon kay mousam main 

Dil ki sar'zameeno pe

Gard kiyon bikharti hai ?

Iss tarah kay mousam main 

Phool kiyon nahin khiltay ?

Log kiyon nahin miltay ?

Kiyon faqat yeh tanhai 

Sath sath rehti hai ?

Kiyon bicharnay walon ki 

Yaad sath sath rehti hai ?

Itni tez baarish se 

Dil kay aainay par se

Aks kiyon nahin dhultay ?

Zakham kiyon nahin mit'tay ?

Neend kiyon nahin aati ?

Baarishon kay mousam main 

Aankh kiyon barasti hai ?

Ashk kiyon nahin tham'tay ?

Barishon kay mousam main ........! 

Haqeeqat aashna meray

Guzarish

Haqeeqat aashna meray 

Hamein jeewan kay raston par kahan tak sath chalna hai ?

Kahan woh morr hai jis ne hamein tanhai deni hai 

Kahan tak tum mujhay thamo gay jab girnay lagon ga main 

Kahan par is tarah ho ga keh tum mujh ko na thamo gay 

Tumhein awaz doon ga tum meri jaanib na daikho gay 

Main jeeta hoon ya marta hoon meray baray na socho gay 

Janam din par karo gay phone na hi card bhejo gay 

Suno sathi !!!

Hamein jeewan kay rastay par jahan tak sath chalna hai 

Wahan tak tum mujhay aadi karo na is tarah apna 

Keh jab woh morr aaye aur apni raah main jaon 

To apnay raastay ko ajnabi apnay liye paon 

Rafaqaton kay naye khawab khush numa hain magar

Rafaqaton kay naye khawab khush numa hain magar

Guzar chuka hai teray Aaitabar ka mousam 

Youn to meri aankhon se tum ko pyar bhout hai

Youn to meri aankhon se tum ko pyar bhout hai 

Lakin jab jee chahaye in main aansu saja detay ho

Patt jharr kay mousam main tujh ko

Patt jharr kay mousam main tujh ko 

Kon se phool ka tohfa bhejon 

Mera aangan khaali hai 

Lakin meri aankhon main 

Naik duaon ki shabnam hai 

Shabnam ka her taara 

Tera aanchal thaam kay kehta hai 

Khushbu , geet , hawa , pani , aur rang ko chahnay wali larki 

Jaldi se achi ho ja 

Subh-e-bahar ki aankhein kab se

Teri narm hansi ka raasta daikh rahi hain !!

Bhout haara hua wajood lagta hai ab apna

Bhout haara hua wajood lagta hai ab apna 

Her kisi ne loota hai mohabbat ka hawala de kar 

Ussay kehna Mukamal kuch nahin hota

Ussay kehna 

Mukamal kuch nahin hota 

Milan bhi na'mukamal hai 

Judai bhi adhoori hai 

Yahan aik mout poori hai 

Ussay kehna 

Udasi jab ragon main khoon ki manind utar'ti hai 

Bhout nuqsaan karti hai 

Ussay kehna 

Bisaat-e-ishq pe jab maat hoti hai 

Mukamal Bas Khuda ki Zaat Hoti Hai