Bhout din se mujhay kuch un'kahay alfaaz ne be'chain kar rakha hai

Bhout din se

Mujhay kuch un'kahay alfaaz ne be'chain kar rakha hai 

Mujhay sonay nahin detay 

Mujhay hansanay nahin detay 

Mujhay ronay nahin detay 

Youn lagta hai 

Keh jaisay saans seenay main  kahin thehri hui hai 

Youn lagta hai 

Keh jaisay tez garmi main 

Zara si dair ko barish baras kay ruk gayi hai 

Ghutan charon taraf phaili hui hai 

Bhout din se

Meri aankhon main sapno ki 

Koi doli nahin utri 

Bhout din se

Khayalon main , dabay paon 

Koi apna nahin aaya 

Bhout din se

Woh sab jazbay 

Jo meri shairy kay mousamon main rang bhartay thay 

Kahin soye huye hain 

Main un ko dhoondnay 

Is zindagi kay dasht main nikla to hoon lakin 

Mujhay maloom hai , jazbay 

Agar ik baar kho jayein 

To phir wapis nahin miltay 

Mujhay maloom hai phir bhi 

Abhi ik aas baqi hai 

Main ab us aas ki ungli pakar kar 

Chal raha hoon 

Ba'zahir shabnami thandak mujhay ghairay huye hai 

Magar main jal raha hoon 

Main ab tak chal raha hoon 

Aag hain amal meray ya sawaab rehnay de

Aag hain amal meray ya sawaab rehnay de

Hashar main hi dekhein gay yeh hisaab rehnay de

Zindagi mo'alm hai tujh ko sab sikhaa de gi 

Is ko seekh lay , parhna her kitab rehnay de

Wasal ki her ik khwaish wasal se bhi behtar hai 

Samnay nigahon kay yeh saraab rehnay de

Yeh na ho kahin tujh ko la'jawab kar doon main 

Kuch sawal rehnay de , kuch jawab rehnay de

Ishq ki musafat main , pyar main , mohabbat main 

Kya kisi ne paya hai , yeh hisaab rehnay de

Gham ko gham se behlana aa kay seekh lay hum se 

Aanso'on ko pee lay tu aur sharab rehnay de

Hum faqeer logon ka aik hi asaasa hai 

Aankh kay katoray main chand khawab rehnay de

Is tarah kay hadsay mujh ko satanay lag gaye

Is tarah kay hadsay mujh ko satanay lag gaye 

Bhool baitha tha jinhein woh yaad aanay lag gaye 

Bas yeh kehna tha " mujhay tum se mohabbat hai " magar 

Yeh bata'nay main mujhay kitnay zamanay lag gaye 

Kuch purani dosti ko yaad kiya , main ne kiya 

Muskura'iye hont , aansoo jhil'milanay lag gaye 

Rut'jagay , teri mohabbat ki ba'doulat mil agye

Dekh meray haath main kaisay khazanay lag gaye 

Hum ne aksar is tarah apna uraaya hai mazaq

Be'basi had se barhi to muskuranay lag gaye 

Kon rokay ga bikharnay se unhein ab dosto 

Aandhiyon kay haath phir se aashiyanay lag gaye

Inayaton ka kabhi wehshaton ka qa'il hoon

Inayaton ka kabhi wehshaton ka qa'il hoon 

Mohabbaton main bari shidaton ka qa'il hoon 

Zameen shaher bhalay mujh pe tang karo lakin 

Tumhein khaber hai keh main hijraton ka qa'il hoon 

Yeh soch kar meray aangan main tum diya rakhna 

Hawa ka dost hoon main aandhiyon ka qa'il hoon 

Her ik mor pe main dil ki baat sunta hoon 

Main raah-e-ishq main kab mashwaron ka qa'il hoon 

Kisi bhi shakhs ko dushman main keh sakta nahin 

Main dushmani main bhi chand zaabton ka qa'il hoon 

 

Us ki palkon pe koi khawab saja rehnay de

Us ki palkon pe koi khawab saja rehnay de

Habs barh jaye ga is dar ko khula rehnay de 

Meray maalik tu bhalay cheen lay go'yaai meri 

Meray honton pe faqat aik dua rehnay de

Meray khawabon ko bhataknay se bachanay kay liye 

Shab ki dehleez pe yaadon ka diya rehnay de

Be'rukhi hi teray mujrim kay liye kafi hai 

Us se munh mor le koi aur saza rehnay de

Chand ban kar teray kamray main utar aaon ga 

Aaj ki raat to khirki ko khula rehnay de

Kisi mousam main bhi janaa

Kisi mousam main bhi janaa

Kisi mousam main bhi janaa

Hamari yaad ka dil se

Agar jo raabta tootay 

To dil ko dosh mat dena 

Samjh lena 

Keh jo tum se yeh kehta tha 

"Tumhara pyar jeewan hai "

Woh ab aisa nahin kehta 

Dost jaisi , kabhi dushman ki tarah lagti hai

Dost jaisi , kabhi dushman ki tarah lagti hai 

Zindagi tu kisi uljhan ki tarah lagti hai 

Aik lamhay main meray mann ko bighoo deti hai 

Us ki her baat hi sawan ki tarah lagti hai 

Teray chehray pe udasi hai meray ghar ki tarah

Teri halat meray aangan ki tarah lagti hai 

Tu bhi ulfat kay taqazon ko nahin samjhi hai 

Teri uljhan , meri uljhan ki tarah lagti hai 

Lahu ronay se darta hoon , juda honay se darta hoon

Lahu ronay se darta hoon , juda honay se darta hoon 

Meri aankhein bata'ti hain keh main sonay se darta hoon 

Meri ungli pakar lena , mujhay tanha nahin karna 

Yeh duniya aik mela hai , tumhein khonay se darta hoon

Jo hansti ho to kiyon palkon kay goshay bheeg jatay hain 

Tumhein maloom hai , main is tarah ronay se darta hoon 

Yeh jab se khawab dekha hai , mujhay tum chor jao gi 

Main ab darta hoon khawabon se , main ab soany se darta hoon 

Woh rangon main dhali larki kabhi jab baat karti hai

Woh rangon main dhali larki 

kabhi jab baat karti hai 

To us kay lafz khushbu ki tarah mehsoos hotay hain 

Woh hansti hai to jaisay sara aalam us hansi main doob jata hai 

Woh lab us kay , woh aankhein woh chehray ki shadabi 

Keh jaisay apsara koi 

Woh mera naam leti hai to meri rooh main jaisay nasha sa ik utarta hai 

Mera mann jhoom uth'ta hai 

Woh rangon main dhali larki

Jhukaye apni aplkon ko kabhi mujh se jo kehti hai 

Mujhay tum se mohabbat hai 

To us ka shar'mageen lehja yaqeen mujh ko dilaata hai keh duniya khoobsurat hai 

Woh rangon main dhali larki 

Udasi kay ghanay sayon ko jab bhi orh leti hai 

Mera dil khoon rota hai 

Main us ki sharbati  aankhon kay num se bheeg jata hoon 

Woh rangon main dhali larki 

Jissay mujh se mohabbat hai 

Mera izhaar sunti hai to phir sab bhool jati hai 

Jhukaye apni palkon ko woh aisay muskurati hai 

Keh jaisay apsara koi 

Woh rangon main dhali larki 

Meray lafzon main rehti hai 

Mujhay aksar yeh kehti hai 

Mujhay tum se mohabbat hai

Hawa kay haath aik paighaam

" Hawa kay haath aik paighaam "

Ussay kehna
abhi tak dil dharakta hai
Abhi tak saans chalti hai
Abhi tak yeh meri aankhein
Sohanay khawab bunti hain
Meray honton ki jumbish main
Tumhara naam rehta hai
Abhi baarish ki boondon main
Tumhara pyar baqi hai
Ussay yeh bhi bata dena
Abhi izhaar baqi hai
Abhi yaadon kay kaanton se
Mera daman ulajhta hai
Tumhara pyar seenay main
Kahin ab bhi dharakta hai
Hawa ab bhi mawafiq hai
Hamaray saath chalti hai
Ussay kehna
Judai ka abhi mousam nahin aaya
Mohabbat ki kahani main
Kahin par gham nahin aaya
Magar sab kuch badalnay main 
Bhala kya dair lagti hai
Kisi ki yaad dhalnay main
Bhala kya dair lagti hai
Nayi subha nikalnay main 
Bhala kya dair lagti hai
Ussay kehna
Woh jaldi faisala kar lay
Naye raston pe chalnay main
Bhala kya dair lagti hai