Sab raastay dushman huye ashjaar mukhalif

Sab raastay dushman huye ashjaar mukhalif 

Tu mera hua hai to huye yaar mukhalif 

Buniyaad rakhon koi to buniyaad hai dushman 

Dewar utha'ta hoon to dewaar mukhalif 

Hathon main utha letay hain ozaan kay pathar 

Suntay hi nahin hain meray Aashaar mukhalif 

Main ishq ko humdard samjh baitha tha yaro 

Lagtay na thay is behar kay asaar mukhalif 

Doon jaan to qurbani samjhta nahin koi 

Gar thora sambhalta hoon  to ghar baar mukhalif 

Is shaher ko sach sun'nanay ki aadat hi nahin hai 

Lagtay hain sabhi ko meray afkaar mukhalif 

Suntay thay keh bas hotay hain agiyaar mukhalif 

Meray to nikal aaye hain sab yaar mukhalif 

Jo baat bhi ho dil main chupata nahin "Farhat"

Her roz bana leta hoon do chaar mukhalif

 

Baahir bhi apnay jaisi khudai lagi mujhay

Baahir bhi apnay jaisi khudai lagi mujhay 

Her cheez main tumhari judai lagi hui 

Jeewan main aaj teray liye ro nahin saka 

Jeewan main aaj raat paraai lagi mujhay 

Mehandi jacchi kuch aisay teray narm haath par 

Ik kainaat dast-e-hinaei lagi mujhay 

Pati teri palak ka kinara mujhay lagi 

Shaakh-e-gulaab teri kalaai lagi mujhay 

Dharkan main taal teray khayalon  ki baj uthi 

Saanson main teri naghma saraai lagi mujhay 

Haq main usi kay faisala her shakhs ne diya 

Her shakhs tak usi ki risaai lagi mujhay 

Mohabbat karnay wali larki

Mohabbat karnay wali larki 

Jaisay tap'tay sehraon main gum'garda raah musafir

Jaisay khaali raston par mud'daton se atki hui nam'naak nigah 

Jaisay veeran ho janay wala jazeera

Jaisay waseh-o-areez fizaon main door door tak tanha badli 

ya 

JAisay ajnabi shaher main apno se bichar janay wali bachi

Abhi se pooch raha hai mujh se sajan seedha saadha

Sajan seedha saadha

Abhi se pooch raha hai mujh se sajan seedha saadha 

Tum ko pyar ziyada hai ya mujh ko pyar ziyada 

Jhoot bhi keh do tab bhi manon  

Main to apna hi janu 

Main tum se kuch bhi na kahon gi 

Karti hoon yeh wada 

Tum ko pyar ziyada hai ya mujh ko pyar ziyada 

Pyar kay lahkhon deep jalaein 

Ik doojay kay saath nibhaein Ik doojay ka maan rakhein gay 

Kar lain aaj irada ....

Tum ko pyar ziyada hai ya mujh ko pyar ziyada 

Veerani ko shaher bana dain

Chand ka pehla pehar bana dain 

Dil main sab jeewan aa jaye 

Itna karein kashada

Tum ko pyar ziyada hai ya mujh ko pyar ziyada 

Laakh doori ho magar nibhatay rehna

Laakh doori ho magar nibhatay rehna 

Jab bhi baarish ho mera sog manatay rehna 

Tum gaye ho to sar-e-shaam yeh aadat thehri 

Bas kinaray pe kharay haath hilatay rehna 

Janay is dil ko yeh aadaab kahan se aaye 

Us ki raahon main nigahon ko bichatay rehna 

Aik muddat se yeh ma'mool hua hai ab to 

Aap hi roothna aur app manatay rehna 

Tum komaloom hai "Farhat" keh yeh pagal'pan hai 

Door jatay huye logon ko bulatay rehna

Kahin aarzu-e-safar nahin , kahin manzalon ki khabar nahin

Kahin aarzu-e-safar nahin , kahin manzalon ki khabar nahin 

Kahin raasta hi andhera hai , kahin paa nahin kahin par nahin 

Mujhay iztaraab ki chah thi mujhay be'kali ki talaash thi 

Inhi khwaishaat kay jurm main koi ghar nahin koi dar nahin 

Koi chaand tootay ya dil jalay ya zameen kahin se ubal paray 

Hum aseer surat-e-haal hain , hamein haadsaat ka dar nahin 

Ae hawa-e-mousam zara mujhay saath rakh meray saath chal 

Meray saath meray qadam nahin meray paas meri nazar nahin 

Yeh jo umar bhar ki riyazatein yeh nagar nagar ki musafatein 

Yeh to rog hain mah-o-saal ka yeh to gardashein hain safar nahin

Main ne dekha dewano ko shaam kay baad

Main ne dekha dewano ko shaam kay baad 

Dhoond rahay thay veerano ko shaam kay baad 

Tareeki phir saray aaib chupa lay gi 

Lay aana ghar meh'mano ko shaam kay baad 

Main ne us ka sog manaya kuch aisay 

Khali rakha pai'mano ko shaam kay baad 

Yaad karay jab mujh ko teri tanhai 

Dekha karna gul'dano ko shaam kay baad 

"Farhat" chand khouf se kar leta hoon band 

Kamray kay roshan'dano ko shaam kay baad  

Ae Ishq mujhay azaad kar do

Ae Ishq mujhay azaad kar do 

Kitni hi 

Zanjeerain 

Dil main 

No'keelay taptay aahan se bhi 

Kahin ziyada chubti hain 

Aur ghutan ki bojhal dewarein to 

Jaisay pusht aur seenay par tameer hui hon 

Ajab ajab se pachtaway 

Aur bila jawaaz pash-e-mani  si 

Sanson aur aankhon main aksar 

Pisi hui mirchon ki sulgan door door tak bhar deti hai 

Be'chaini kay halqay rooh ko 

Sakhti se jakray rakhtay hain 

Aansoo galay ko 

Andar se pakray rakhtay hain 

Hijar ki jailein 

Shaher ki jailon se barh charh kar 

Umar da'boch liya karti hain 

Jo kuch karna ho aakhir main 

Pehlay soch liya karti hain

Deeda-e-num main sakoon dhoondtay hain

Deeda-e-num main sakoon dhoondtay hain 

Hum teray gham main sakoon dhoondtay hain 

Shaher bhar se hain marasam apnay 

Phir bhi kam kam main sakoon dhoondtay hain 

Hum bhout heech aza'daar teray 

Teray maatam main sakoon dhoondtay hain 

Log ghabra'iye huye baarish kay 

Khushk mousam main sakoon dhoondtay hain 

Aap kay naam main sukh patay hain 

Aap kay dam main sakoon dhoondtay hain 

Tujh se hum is liye miltay hain bhout 

Rabt-e-pe'ham main sakoon dhoondtay hain 

 

Kaha main ne kahan ho tum jawab aaya jahan ho tum

Kaha main ne kahan ho tum 

Jawab aaya jahan ho tum 

Meray jeewan se zaahir ho 

Meray gham main nihaan ho tum 

Meri to sari duniya ho 

Mera sara jahan ho tum 

Meri sochon kay mehwar ho 

Mera zor-e-biyaan ho tum 

Main hoon lafz mohabbat hoon 

Magar meri zuban ho tum