Manohar kya waron tujh par

Manohar 

Kya waron tujh par 

Meri jeewan thaali main to 

Sheesh nahin koi 

Bas naina rehtay hain 

Jalay huye sapno ka tatt

Maathay teray kya tilak lagaon 

Raakh bhi meri maang 

Oak main teri kya jal daroon 

Main sam'puran pyas 

Kuch shabdon kay moti hain 

Par kya is chandar mukh aagay 

Teri janam girha main mohan 

Kon sa phool main taankon 

Mann bagiya sooni hai 

Aur paraye phoolon par hai 

Kya mera adhee'kaar   

Bas aik aatma rehti hai 

Jo daan karon tujh par !

Manohar 

Kya waron tujh par ?

Chalo is khawab ko hum tark kar dain

Chalo is khawab ko hum tark kar dain 

Aur aankhon pe saja dain 

Keh her tasveer main halka gulabi rang chahnay se nahin aata 

Bhout se naqsh , naqaash azal aisay banata hai 

Keh jis ka hashiya gehra siyah 

Aur naqsh halka sur,mai rehta hai 

Aur jis par kis bhi zawiye se chand utray 

Yeh kabhi roshan nahin hotay 

Khuda kuch kaam aadhi raat ko karta hai 

Jab is kay piyalay main 

Siyahi kay siwa kuch bhi nahin hota 

Yeh khaaka bhi 

Kisi aisi hi sama'at main bana ho ga 

Hamari aankh main jo khawab utra tha 

Bhout khush rang lagta tha 

Magar is kay damaknay main 

Kai aankhein lahu hotein 

Kitabon aur phoolon se sajay jis ghar kay aangan main 

Hum apnay aap ko khiltay huye mehsoos kartay thay 

Wahan ik aur ghar buniyad se youn sar utha'ta tha 

Keh hum andar se hil jatay 

Magar chup chaap rehtay thay 

Yeh chup deemak ki surat hum ko ik din chaat jati 

Tumharay dukh se main waqif hoon 

Aur apnay muqaddar ki lakeeron ki bhi mehram hoon 

Hamaray bas main rangon ka chunao hai 

Na khat ka 

So is tasveer ko tehleel kar dain 

Hum apnay canvis tabdeel kar lain !

 

Khuli aankhon yeh kaisa khawab meray samnay hai

Cinderella (unisited)

Khuli aankhon yeh kaisa khawab meray samnay hai

Diye aangan se lay kar aasman tak 

Gulab-e-taza ki khushbu chaman se sehan-e-jaan tak 

Baloreen jaam 

Aur is main damakti surkh may 

Aur is kay nashay se farozan un ka chehra 

Sitaron se bana mera libada 

Sarapa-e-iztraab ik shahzada 

Fars pe sham'ein jalata aik wada 

Dilon kay vilon par 

Walz kartay do badan 

Auras kay shano par rakhay sar

Zindagi se

Neem sar'goshi main ik hi baat dohraati hui 

Khushbu-e-lab 

Aur is ka jadu 

Gajr bajtay hi aadhi raat ka 

Yeh khawab yak dam toot jata hai 

Sitaron se bana malboos mera 

Phir khas-o-kha'shaak ho jata hai 

Mera rath achanak toot jata hai 

Meri sheeshay ki juti raqs-e-geh main choot jati hai 

Magar agli sehar 

Meri taraf 

Shahi mehal se 

Koi qasid 

Doosray paon ki furqat main nahin aata !

Aakhon ne kaisay khawab tarashay hain in dino

Aakhon ne kaisay khawab tarashay hain in dino 

Dil par ajeeb rang utar'tay hain in dino 

Rakh apnay paas apnay mah-o-mehar ae falak 

Hum khud kisi ki aankh kay taaray hain in dino 

Dast-e-sehar ne maang nikali hai baar'ha 

Aur shab ne aa kay baal sanwaray hain in dino 

Is ishq ne hamein hi nahin moh'tadal kiya 

Us ki bhi khush mizaji kay char'chay hain in dino 

Ik khush'gawar neend pe haq ban gaya mera 

Woh rat'jagay us aankh ne kaatay hain in dino 

Woh qehat-e-husan hai keh sabhi khush jamal log 

Lagta hai koh'kaaf pe rehtay hain in dino

Taar-e-maz'gaan nahin mil raha tha

Taar-e-maz'gaan nahin mil raha tha 

Zakham kis yaad ka sil raha tha 

Barf main roshni ghul rahi thi 

Woh meray khawab main raha tha 

Kuch ajab roshni baagh main thi 

Phool kis rang ka khil raha tha 

Samnay tha woh aur dono chup thay 

Ab na hum thay na woh dil raha tha 

Rang-o-roghan ki baatein mehal main 

Shaher buniyad se hil raha tha 

 

Lo chraghon ki kal shab izafi rahi

Lo chraghon ki kal shab izafi rahi 

Roshni teray chehray ki kaafi rahi 

Apnay anjaam tak aa gayi zindagi 

Yeh kahani magar ikhtalafi rahi 

Hai zamana khafa to baja hai keh main 

Us ki marzi kay bilkul munafi rahi 

Aisay mohtaat , aisay kam'amez se 

Ik nazar bhi tawajo ki kafi rahi 

Subha kya faisala hakim-e-no karay 

Jashan ki raat tak to mo'afi rahi 

Rukhsat ki kasak rahi hai ab tak

Rukhsat ki kasak rahi hai ab tak 

Ik shaam sulag rahi hai ab tak 

Shab kis ne yahan qadam rakha tha 

Dehleez chamak rahi hai ab tak 

Maathay pe woh lab thay saniya bhar 

Aur rooh mehak rahi hai ab tak 

Dekha hai yeh kis nazar se us ne 

Tasveer damak rahi hai ab tak 

Jo baat kahi nahin thi us se 

Lehjay main khanak rahi hai ab tak 

Kab ka hua khaali saghar shaam 

May hai keh chalak rahi hai ab tak 

Bin aks yahi kaisi jag'magahat 

Sheeshay se jhalak rahi hai ab tak 

Woh chasham keh baagh aashna hai 

Jungle main bhattak rahi hai ab tak  

Dono kay labon tak aatay aatay 

Ik baat atak rahi hai ab tak 

Baarish ki hai chah shaakh ko aur 

Badal se jhijak rahi hai ab tak 

Shano pe nahin woh haath lakin 

Chadar si sarak rahi hai ab tak

Taron kay liye bhout karri thi

Taron kay liye bhout karri thi 

Yeh rukhsat-e-mah ki gharri thi 

Her dil pe hazar neel niklay 

Duniya kissay phool ki charri thi 

Wahan dhair tha pathron ka tayaar 

Yahan phool ki aik pankhrri thi 

Dariya meray samnay tha lakin 

Main pyas se jaan balb kharri thi 

Dekhon gi main aaj us ka chehra 

Kal khawab main roshni barri thi 

Tha jhoot ameer-o-takhat Araa

Sachai saleeb pe garri thi

Juz talab us se kya nahin milta

Juz talab us se kya nahin milta

Woh jo mujh se zara nahin milta

Jaan lena tha us se mil kay hamein

Bakhat se to siwa nahin milta

Zakham khilnay kay muntazir kab se

Aur lams-e-hawa nahin milta

Kis qadar bad'naseeb badal hain

Jin ko dast-e-dua nahin milta  

Mera maslak nahin qasaas magar 

Kya mujhay khoon baha nahin milta 

Bastiyan aakhri damon par hain 

Aur harf-e-shiffa nahin milta 

Aik Asaib kay makan main hoon 

Aur rad-e-balaa nahin milta 

Daikh kar dana jo aaye hain sar-e-shakh prind

Daikh kar dana jo aaye hain sar-e-shakh prind 

Rutt badalnay pe to youn bhi nahin rehnay walay 

Shaher-e-veerani main sehra-o-biyabaan se barha 

Ab to yahan ehal-e-junoon bhi nahin rehnay walay 

Khaak ho jayein gay qatil bhi yahan teegh ba'dast 

Aur ghal'teeda bakhon bhi nahin rehnay walay 

Waqat aisa hai keh ab hashar hai kuch dair ki baat 

Mut'maein ehal-e-sakoon bhi nahin rehnay walay