Aankhon main koi khwaab utarnay nahin deta
Yeh dil keh mujhay chain se marnay nahin deta
Bichray to ajab pyaar jata'ta hai khatton main
Mil jaye to phir had se guzarnay nahin deta
Woh shakhs khizaan rut main bhi mohtaat rahay kitna
Sookhay huye phoolon ko bikharnay nahin deta
Ik roz teri pyaas khareeday ga woh gabhro
Paani tujhay panghat se jo bharnay nahin deta
Woh dil main tabasum ki kiran gholnay wala
Roothay to ruton ko bhi sanwarnay nahin deta
Main us ko manaon keh gham-e-dehar se uljhon
"Mohsin" woh koi kaam bhi karnay nahin deta
No comments:
Post a Comment