Thi haqeeqat to fasanay ki zaroorat kya thi
Hum se larnay ko bahanay ki zaroorat kya thi
Hum na kehtay thay keh phir loatna mushkil ho ga
Yeh raah-o-rasam barhanay ki zaroorat kya thi
Woh samajhta hai chraghan ka hai mela koi
Is qadar deep janalay ki zaroorat kya thi
Us ko maloom nahin rog sadaf ka shayed
Warna zaahir ko chupanay ki zaroorat kya thi
Aisa pani ka dabaao hai keh jee phat'ta hai
Itni gehraai main janay ki zaroorat kya thi
Aik pathar pe kiya naqsh hawa ne mujh ko
Her taraf khaak uraanay ki zaroorat kya thi
"Saad" kaanton se rafu karna hai daman apna
Raah main phool bichanay ki zaroorat kya thi
No comments:
Post a Comment