Keh main ab dost koi banaata nahin

Kehtay hain , kuch log zindagi main aatay hain is tarah 

kab , kaisay jigar jaan dost ban jaatay hain kiya pata 

Par meri veeraan zindagi main yeh hota nahin 

Keh main ab dost koi banaata nahin 

Kuch log milay thay mujhay bhi raah-e-zindagi main 

Saath chalain gay woh mera aisa waada tha un ka 

Koi kisi kay liye yahaan rukta nahin 

keh main ab dost koi banaata nahin 

Her baar mujhay ik chot lagi hai kuch aisay 

Keh tukray huye hain kai aaitabaar kay meray 

Bikhray un tukron ko main samait'ta nahin 

keh main ab dost koi banaata nahin 

Meray dil kay tukray to her koi lay gaya mujh se 

Badlay main bas ik soona pan dy gaya her koi 

Keh mera dil bhi ab meray paas nahin 

Keh main ab dost koi banaata nahin

Sar pe mohabbat ki rida taanta nahin

Main jal raha hoon dhoop main , woh maanta nahin 

Sar pe mohabbat ki rida taanta nahin 

Jissay ghar ki eent eent pe likha hai mera naam 

Iss ghar main ab koi mujhay pehchaanta nahin 

Kiya chahata hoon us se meri aarzoo hai kiya 

Sab kuch woh jaanta hai magar jaanta nahin 

Sulee pe taankta hai magar iss adaa kay saath 

Mujrim bhi pyaar ka mujhay gar'daanta nahin 

Hoti hai sab ko ishq main sood-o-ziyaan ki aas

Meri tarah to khaak koi chaanta nahin

Pehlay itna roye nahin thay jitna roye barson baad

Yaadon ka aik jhonka aaya hum se milnay barson baad 

Pehlay itna roye nahin thay jitna roye barson baad 

LAmha lamha dil ujraa hai mushkil se yeh ehsaas hua 

Pathar aaye barson pehlay sheeshay tootay barson baad 

Bhool jaaon kis ne tora , kaisay tora , kiyon tora 

Dhoond rahay ho galiyon main dil kay tukray barson baad 

Dastak ki umeed lagaye kab tak aakhir jeetay hum 

Kal ka wada karnay walay milnay aaye barson baad 

Yaadon ka aik jhonka aaya hum se milnay barson baad

Pehlay itna roye nahin thay jitna roye barson baad

Saa'khi Baithay rahay koi gada'gar hi nahin aaya

Sakhawat na namood afroz manzar hi nahin aaya 

Saa'khi Baithay rahay koi gada'gar hi nahin aaya 

Yeh socha tha teri khaatar koi motti nikaalon ga 

MAin jis raastay main tha us main samandar hi nahin aaya 

Pehan kar ayein gay , phirti dewaangi apni 

Tamana thi bhout jis ko woh pathar hi nahin aaya 

Baharain , bailain , jharray pattay lagay jalay dareechon par 

Makeen aisa gaya ghar se palat kar hi nahin aaya 

Chamak jis ki bulaa leti uqaabon ko nashaiman se 

Fizaon main koi aisa kabootar hi nahin aaya 

Dafeeno ki tarah dil main khazanay reh gaye saaray 

Samandar kiya karay koi shanawar hi nahin nahin aaya 

diya hi jab bahib ho ga hawa kis ko bujhaye gi 

Chraagh-e-raah main ab kay jala kay hi nahin aaya 

Kabhi barson nahin miltay kisi halki ranjish main

Kabhi hum bheegtay hain chahaton ki tez baarish main 

Kabhi barson nahin miltay kisi halki ranjish main 

Tum hi main devtaaon ki koi khoobi na thi warna 

KAmi koi nahin thi meray andaaz-e-parastish main 

Yeh pehlay soch lo phir aur bhi tanha na ho jaana 

Ussay choonay ki khwaish main ussay paanay ki koshish main 

Bhout se zakham hain dil main magar ik zakham aisa hai 

Jo jal utha hai raaton main jo loo deta hai baarish main  

Meri manzalon kay hasool main teri raah aye to kiya karon

MAin bhula chuka sabhi waastay jo thay manzalon kay hasool main 

Meri manzalon kay hasool main teri raah aye to kiya karon 

Jo pukaarta tha her aik gharri jo jura tha dil se laree laree

KAho shakhs aisa agar kabhi mujhay bhool jaye to kiya karon 

Kabhi saath tha jo keh du'ba'du tha hamesha meri hi ru'ba'ru

Jo barhaa raha tha qadam meray woh hi dag'magaye to kiya karon 

Woh chragh-e-dar jo jala kabhi main bujha chuka hoon magar kabhi kay

Bujha hua bhi diya agar mera ghar jalaye to kiya karon 

MAin ne aks tak to mita diye sabhi aainay bhi chuppa diye 

Tujhay dekhta koi door se meray paas aye to kiya karon 

tu keh raha hai dil jissay woh meri khwaishon ka mizaar hai

Teray tabsaray hain be'khabar meri dastaan-e-hayat se

tu keh raha hai dil jissay woh meri khwaishon ka mizaar hai

Tera shukriya ae tabeeb-e-jaan yeh khaloos apni jaga magar

Teri masihaai bhi kiya karay mera dard hi be'shumaar hai

Meray raaston main jo aa gaya meray kaaflay ko jo kha gaya

Woh toofaan to kab ka guzar gaya par dil main ab tak ghubaar hai

Ae meharbaan dost sun meri mushkalon ko , samjh keh main 

Teri mohabbaton ka kiya karoon kissay dil pe ab ikhtiyaar hai 

Naye mousamon ko bulaao mat keh mujhay kushbo'on ki talab nahin 

Meri raah rehnay do khaar khaar meray liye to yahi bahaar hai 

Jo nafraton se jhulas gaya ussay dil se saaray duaein do 

Par us sitam zada ka kiya karain jo mohabbaton ka shikaar hai

Sar-e-raah kuch bhi kaha nahin , kabhi us kay ghar main gaya nahin

Sar-e-raah kuch bhi kaha nahin , kabhi us kay ghar main gaya nahin 

Hum janam janam se ussi kay hain , ussay aaj tak yeh khabar nahin 

Ussay paak nazron se choomna bhi ibaadaton main shumaar hai 

Koi phool laakh qareeb ho , kabhi main ne us ko chuaa nahin 

Yeh khudai din bhi ajeeb hai , keh usi kay naam naseeb hai 

Jissay tum ne chaha woh mil gaya , jissay main ne chaha woh mila nahin 

Isi shaher main kai saal se , meray kuch qareebi aziz hain 

Unhain meri kuch bhi khabar nahin , mujhay un ka koi pata nahin

Raaz-e-ulfat chupa kay dekh liya

Raaz-e-ulfat chupa kay dekh liya 

Dil bhout kuch jala kay dekh liya 

Woh meray ho kay bhi meray na huye 

un ko apna bana kay dekh liya 

Aur kiya dekhnay ko baaqi hai 

Aap se dil laga kay dekh liya 

"Faiz" takmeel-e-gham bhi na ho sakay 

Ishq ko azmaa kay dekh liya

Sulagtay labon pe giraa aur paani

Sulagtay labon pe giraa aur paani 

Bari tishnagi hai pilaa aur paani 

Sunaa jab wahan pyaas bujhti hai sab ki 

Samandar ki jaanib gaya aur paani 

Chalain gay to taaza rahain gay hamesha 

Hawa, khoon , samaa , raasta aur paani 

tahay khaak-e-sehraa mili aur kushki 

Samandar ki teh se mila aur paani 

Suna hai keh sehraaon main biktay hain aksar

Lahoo, jism , insaan . wafa aur paani 

Samandar nadi pee gaya aur bola 

Zara ur paani , zara aur paani 

Feroz us ne poocha keh kiyon aankh nam hai 

Meri aankh main bhar gaya aur paani